Ral Thang Lungset

Home » Hmun Le Hma » Chinram Hmun Ropi » Ral Thang Lungset

By vcth on April 20, 2015.

RAL THANG LUNGSET

Ral Thang Lungset (Ral Thang Lung Sahmi) hi a tu Rallawn khua ih a thlanglam peng 2 hrawng ih a um mi a si.

A thuanthu a tawi theinak in lo hlawm hai ka duh. Lei doraal, minung le mikei an um tlanglai ah Khualsim miphun pawl ih suahkehnak Siimpi khua ih a um mi Pu Ral Thang cu mi cak hminthang a rak si.

Voikhat cu ral pawl in siim dingin an khua Siimpi ah an va pan, asinan, Pu Ral Thang cu ‘Farman’ an ti mi an lo pil ah lo a thlo ih khua a rak hlum lo ti an thei tik ah a lo thlawhnak ih siim ding in ral pawl cun an va pan. An fehnak zin ah mi pakhat a keh le vorh ih banluang (vok rawl ding) tluanli veve a pu mi thawn an hmu aw. Khui nan feh ding tin cupa in a sut hai tikah,’Ral Thang a cak tuk an ti ih siim ding ah kan feh’ ti’n an sim. Cupa cun, ‘Cawl hrih uh, Ral Thang cu ka thei si. A umnak ka lo sim hai ding a ti.’ An to tlang hai ih thunuam an rel tlang hnu ah ral pawl cu feh an tum. Cutik ah pakhat pa cun, ‘Ral Thang neh nan duh a si le himi lungpi par ih ka retmi bancang tluan riat le a lungpi hi tan ko nan sat thei a ṭul ding’ a ti hai.
Ralpawl tla cun an ralnaam an suah ih an sat cio. A hrek bancang luang thum tan na, luang nga tan na, mi cak deuh in a lung tiang va hlen na, lungto kha zungli bok tiang hlen thei kha a cak bik a si.

Pakhat pa cun a tu keimah caan a ti ih a naam cu a vun suah ve ih ”Naisailo Ral Thang sing ee” ti’n a au ih a vun sat. Bancang luangriat lawng si lo in lungpi tla a phel cih.

Ralpawl cun Pu Ral Thang cu kan lo neh lo a si an ti. Pu Ral Thang cun ‘Rualpi ṭha kan sisi kan khua ah in thlun ding’ a ti hai. An khua an thlen in vok a thah hai, zu a siak hai. A thaizing an tlun zik ah tla suncaw ṭha ten fun in a thlah hai ti a si.

Source: Rallawn khuami cipi pa ih in sim mi a remcang daan ih ngan mi a si.

By Lal Rohnuna

Na ruahnak