Ramkhel Hruang vs Internet Gig

Home » Thlirnak » Ramkhel Hruang vs Internet Gig

By vcth on November 9, 2016.

hillary-clinton-julian-assange

US President hrilawkncak cu a result kan thei ih ruahnak hnakin Donald Trump in a neh. US hrilawknak kan zoh tikah Donald Trump le Hillary Clinton zuamawk ti men lawng a silo. Hih a dunglam ih Ramkhel hruang (Political Network) le Internet thudik hawltu pawl ih zuamawknak pi tla a si.

Pi Hillary Clinton hi a corrupt, mi dingfel lo tiin mi tampi in an ti. A hleice in a email leak mi pawl kan zoh tikah kan hmu thei. Asinan bulpak in mi dingfel lo zet cu a va si ciamco ding ka zum lo. A dunglam ih Political system, network ih duhdaan in a sinak a khal sawn in ka hmu.

Tuitum campaign ah tla mainstream media pawl hmauhhmauh cu a dung ah an um, cun pursum leilawnnak lam ih thil thupi pawl, bank pawl, hrimhrei company pawl le milian pawl tiin a dunglam ah an um. Thuneihnak – Pursum – Media a kom aw mi cu Ramkhel hruang tiah kawh theih a si. Hi thil 3 an kom aw tikah zianghman ih hnin theih lomi system pakhat ti theih a si. Hih system sungah t’hatlonak, diklonak, lai-nonnak, ei-ruknak, t’anbul neihnak ti pawl a phunphun a um nan anmah le anmah an hup an phen aw sak ih mipi ih theih a si lem lo. Mipi hrekkhat in an thei hmanah hmakhat te ah a ziam sal.

Tuitum hrilawknak ah Donald Trump ih a nehnak a san pawl hi hawl sehla Wikileaks hi pakhat ih ruah theih a si ding. Amah Donald Trump ih thiamnak, a zuamnak, ram a duhdawtnak pawl tla cu a tel ko nan Wikileaks hi hngilh theih a silo.

Wikileaks cu thudik tarlang duhtu pawl hrangih platform pakhat a si. Leitun hmun tinkim ih Internet Gigs pawl in an fir thukmi thudik pawl cu Wikileaks ah an pek ih cutin Wikileaks ihsin mipi thieh in tarlang a si.

Hi internet gigs le hacker hrekkhat pawl ih tumtahmi cu mai hrnagih fir, mai bulpak hlawknak hrang ti a va si lemlo. An nunnak hrnag hman t’ihnung a um zet nan t’ihnung za lak ihsin leitlun ram picang pawl ih thil diklo an tuahmi pawl an pho lang. Cutiih an pho langnak thawng in mipi in an cozah ih thil tuahmi, diklo ih an tuahmi ti pawl an thei.

US cu leitlun ih rampibik pakhat a si vekin tuitum hrilawknak cu zo cio ih thlir cio a si. Tuitum ih hrilawknak cu Republican le Democrat zuamawknak ti men lawng siloin Ramkhel Hruang (Political System) le thudik a hawltu Internet Gigs pawl ih doawknak pi a si.

Tuitum US hrilawknak ih nehnak a cotu pawl cu Donald Trump, Republican, Thudik duhtu mipi, Wikileaks, Julian Assange pawl an si ti sehla a sual lo men ding.

Na ruahnak