Rebecca Zahau thattu hi Adam Shaknai tiah zum

Home » Cahram » Rebecca Zahau thattu hi Adam Shaknai tiah zum

By vcth on December 27, 2017.

Sih-ni Keith Greer cun Rebecca Zahau cu mah le mah that aw a silo, a tlangval pa ih a naupa Adam Shaknai in a that ding a zum thu a phuang.

Rebecca Zahau cu 2011 July 13 zinglam Coronado CA ih an inn varenda ah a thlai aw that in hmu a si. San Diego County palik in Rebecca cu mah le mah that aw a si tiah 2011, September 2 ah an than.

Keith Greer cun Rebecca cu a lu ah voi 4 vuak a tuar hnu ah a hngawng in dek that a si. Cuhnu ah mah le mah that aw vekin an varenda ihsin thlai a si tiah a ti.

Adam Shacknai cu mithattu tiah zum a sinan tetti fiangfai ngaingai a um lo ruangah kai a silo. February 23, 2018 ah thuthennak zungah hi thu rel bet ding a si.

Rebecca Zahau cu Chin ramkulh Falam ih suak a si. Amah cu Pu Khua Hnin Thang le Pi Zung Tin Par te ih fanu a si. Nepal ram ah an vai, cun Germany ah. 2001 hrawngah US a thleng tiah theih a si. 2002 ah Neil Nalepa thawn an nei aw ih 2011 February ah an tthen aw, kum 9 sung an um tlang.

A pasal thawn an tthen aw hlan in milian Jonah Shacknai, Medicis Pharmaceutical ih CEO, thawn an duh aw.

Jonah Shacknai tla nupi 2 nei zo a siih a nupi neta sawn thawn fapa pakhat Max Shacknai an nei.

July 11, 2011 ah Rebecca le a tlangval pai fapa, Rebecca ih a naunu Xena cu inn ah an um. Max cu vansiat ah innsung karbak/lilawn ihsin a tlak. Cui thil canglai ah Rebecca cu ti a kholh lai a si. A naunu Xena in 911 a ko. Cutin Max cu sizungah kuat a si.

July 12 ah Rebecca cun a naunu Xena cu Airport ah a thlah, cun a tlangval pa ih a nuapa Adam Shacknai a hmauk. Rebecca le Adam le Jonah cu zaan riah an ei tlang. Cuhnu ah Jonah cu sizung ah a feh.

Palik pawl in Rebecca phone an zoh salnak ah zaan nazi 10:00 hrawngah Rebbecca cu a unu Mary Zahau-Loehner thawn message an kuat aw, a nau Xena damten inn a thleng thu a than. Zaan nazi 10:50 ah Max ih a nute (a nu ih unu) hnen in message a ngah. Max a bese deuhdeuh ti a si. Cun 12:38 Junly 13 zinglam ah voice mail pakhat a ngah. Cui voice mail cu a ngai. Asinan cui voice mail delete sal a si ruangah ziang a si ti zohman in an thei lo.

July 13 zinglam nazi 6:45 ah Adam Shaknai in 911 a ko ih Rebecca a thlai aw that thu a than, cun a upa Jonah hnen ah tla thu a than. Adam cun palik thleng hlan ah Rebecca ih ruak cu amahten a tthum. Rebecca cu a kut le a ke hri in ttawn a si.

Rebecca ih thihnak kum 6 le hrek a si thlang nan hi case hi tutiang a cem thei hrih lo. Rebbecca sungsang lam in cu peisa hi thu tlungten a cem ding le mithattu thei fiang ding lawng an beisei thu theih a si.

Na ruahnak