Rinsan Awnak Maw Upat Awnak

Home » Cahram » Rinsan Awnak Maw Upat Awnak

By vcth on January 29, 2014.

COnfidence building

Francis Cung Bik

Tulai mino tampi ih kan uar zet mi cu mah le mah rinsan awnak (self-confidence) ti ṭongkam hi a si. Mah le mah rinsan aw thei dingin a cang thei tawkin kan zuam cio, rinsan aw thei ding khop ih sinak nei dingin tla kan zuam cio. A hleice in ram ṭhangso pawl le ṭhangso rero lai pawl (2nd world) pawl ah rinsan awnak ti hi an thupit ter nasa.

Rinsan awnak timi ih a hram hi ziang a si ti kan zingzoi asile rinsan awnak cu thiamhleinak (specialization or expert) thawn a pehpar aw. Tahṭhimnak ah Pastor pa rinsan aw zetin thu a sim, computer programmer pa rin aw zetin computer a rem, Bawia rin aw zetin guitar a tum tvp… Curuangah mah le mah rinsan awnak kan timi cu ramri a nei.

Tulai mino tampi mah le mah rinsan aw a thupi ti kutkaih ah hmang ta hratin ziang hmuahhmuah ah rinsan aw a tum tu an um. Cu pawl an mah le mah cu thu ngai thlak zetin an rinsan aw nan midang hrangih hnihsuak za ah a caancaan cu an cang ṭheu. Ziangah ti le an hruangkon leng an lan ruangah a si.

Na thinlung sung ten rinsan awnak ti a thupi lo na ti maw si tiah in sut men thei. Mah le mah rinsan awnak a thupi lo ti hnakin cu hnakih a thupi sawn mi ka sim duh ruangah a si. Cucu mah le mah man neih aw ternak (self-esteem) hi a si. Mi tampi rinsan aw kerker nan man nei aw ter (upat aw) lo tu tla an um. Man na neih zia thei hmaisa lo in, nangmah le nangmah upat aw hmaisa lo in mi ih upat ding le mi ih man neih ter ding cu hngak hlah aw. An lo upat hman ah a langte lawng a si ding, rei an lo pawl le cui an lo upatnak pawl a hlo thluh ding. Ziangah? Man na nei zia na thei aw lo, cu vekin man an nei zia na thei thiam lo.

Mah le mah upat (man neih aw ter) awmak in, “man a nei mi na si ruangah man nei zetin na tik cu caan na hmang ding, man a nei mi nunnak ah ke na kar ding.” Nangmah le mah man nei ih na hmuh aw vekin mi tla man nei in na hmu ve ding. Cutin mi pakhat an sinak kha na upat ding. Cu vek minung na si ruangah mi pawl tla in an lo upat ve ding, an lo kom ngaih ding. Duhtu na nei tam ding, a lo rinsantu tla an tam ding.

Man a nei mi minung na si zia na thei aw asile cu na tha a nau dah lo ding, ziangah man nei zet mi na si ruangah. Fala pakhat a man khung zetmi lungvar ih tuahmi ṭhi a orh tikah a mithmai a zum lo, ral ṭha zet ih a suak bangin man a nei zet mi na nunnak a neitu na si ti na kai hnget ahcun a tleu var sinsin mi lamzin ah na nunnak cu na hruai so vivo ding. Cutin na hrang, na kiangkap hrang le mipi hrangih man a nei mi nunnak a neitu na si ding.

Na ruahnak