RO

Home » Cahram » RO

By vcth on November 18, 2015.

Boy

Johnlsl

A lian zetmi England miuk Fitzgerald sungsang ah fapa pakhat te an nei. An duh daan le an duat daan cu sim ding um lo, an sungsang pawlih buaipimi le thupit ter bikmi a si ih an mit hmuahhmuah le an thinlung hmuahhmuah cu cu’i fapa te parah an ret ṭheh.

Fapa te cu a hung ṭhang vivo. Nan, vansiat melmak ah a nu nih a thih san. Fitzgerald cu a nupi’h tansan lunglen le zuun a tuarnak hmuahhmuah cu fapa te parah a ṭhum, a fapa te cu a let in a duat sinsin. Caan cu a liam vivo, kum tawkfang a her, a fapa te cu besia zetin a na ih dam nawn lo in a thi lan ta.

Fitzgerald ih neih le siah cu nasa zetin a pungzai vivo. A sumpai pawl cu leitlun kut thiamnak lam hminthang bik pawlih kutneh pawl leinak ah a hmang. Cutin leitlun ih ro ṭha le thilmak tampi cu paisa tom hmang in a khawl.

Caan a herliam vivo, amah Fitzgerald tla a dam lo, cutin mual a laim ve ta. A thih hlanah a neihsiah a hlawnthil pawl ziangtin rak tuah ding ti fiangten a ngan ta ṭheh. Acozah daanthiam upa pakhat hnenah tuahdaan ding a sangsang in thu a tan ta. Ahleicein a neihmi lakih mankhungbik pawl a simi zuk (pa-gyi) hlawnthil pawl lilan (auction) tuah ding ti a si. Leitlun hmun zakip in pa-gyi duhtu, leitu, khawltu pawl, bulpak in siseh, pawlkom in siseh an ra pok cio.

A pa-gyi pawl cu million saircawklo mirang tangka pounds ih a rak leimi pawl an si. Lilan thok hlanah cu’i an zuar dingmi thil pawl cu zaten zoh thei dingin an ret cia. An zoh celcel, khawvel hminthang pawlih kutneh tampi lakah hmin theih a si lomi mi pakhat ih suaimi nauhakpa zuk te a rak um ve. Zohman nih thupi ah an ret cio lomi cu’i zuk cu Fitzgerald ih fapa neihsun te a si.

Lilan cu an thok thlang, daanthiampa cun Fitzgerald ih lilan tuah a duhdaan a dotdot ih nganmi ca-ik cu ong in, sair in, tuah vivo ding cu a si. Apakhatnak thutan vekin lilan thoknak ah “fapa’ timi a ṭawntai zetmi pa-gyi kha an zuar thok. Zohman nih man malte tla pek an duh lo, an tum lo, a lakih pek hmanah an tlun paih lo ding vek khi a si.

Nan, putar pakhat nih cu lei dingah man a pek thok, zo hman nih a pekmi man malte lan in an pek bet lo. Cu’i putarpa cu an hnen ih rak um ringring le cu’i nauhakpa te rak kilkhawitu, rak duhdawt zettu a rak si. A neihsun paisa hmuahhmuah te thawn cu’i nauhakpa te zuk cu a lei suak ta.

Lilan peh bet dingin ca dang cu a phorh, mipi nih hngakhlap zetin an hngak ṭhepṭhep. Daanthiampa nih Fitzgerald ih pahnihnak thutan cu a sair, “ Zokhal siseh hih ka fapa ih zuk a leitu nih ka rothil hmuahhmauh a lak in co seh, lilan a cem”.

Robert Strand ih the Final Bid

Na ruahnak