Salai Publisher neitu Salai Maram (aka) Salai Mithli suhtonnak

Home » Interview » Salai Publisher neitu Salai Maram (aka) Salai Mithli suhtonnak

By vcth on October 17, 2015.

Chin calai hrang ih a zuam zettu, mino te Salai Maram cu Salai Publisher timi a din ih Calai thansonak hrangah cauk suah in siseh, ca ngan lam in siseh, Biazai lam in siseh, ti thei tawkin zuam zettu a si. Chinmi cangantu pawl cauk suah saktu khal a si. Hiti vekin Chin calai ṭhansonak parih a zuamnak parah, Vancung Thaihlio Media in kan lawm zet. A zuamnak pawl thawn pehpar aw in, thusuhnak kan rak nei.

Salai Mitthli

VCTH: Salai Van Cung Lian ih ngan mi “Kum 123 sung ih Falam Pi A Kekar Daan” timi cabu nasuahnak nak ihsin na hmin kan lo thei ih, cabu suah lam na tuahnak a rei zo maw?

Salai Maram: Si, Salai Van Cung Lian ih cabu kan suah hi mipi tampi thinlung khal kan lak ngah in ka thei ve. Thuanthu tampi a phum aw lawng siloin thuanthu kan khum cih tin ka ruat. Cabu tuah ih kan suah cu 2011 kum ihsin a si ih midang nganmi kan suah hmaisak bik cu Facts of Falam timi cabu a si. 2013 kum, ah kan rak suah ih Kawlram khalah uk 500 kan zuar suak thei.

VCTH: Cabu suah thei lo pawl na suah sak ti kan thei ih, zo pawl ih cauk na suah sak zo? Cun Calai lam ah a dang ziang pawl cangvaihnak na nei?

Salai Maram: Cabu suah thei lopawl ti si sawn loin, ca ngantu hnen ta kan dil ṭheu sawn. Cabu ih kan suah zomi pawl cu,

  1. Mai Sokhlei Par ih nganmi, Thangsung Va,
  2. Francis Lal Uk ih nganmi Facts of Falam,
  3. Caleb L Ci Luai ih nganmi Jesuh Khrih Ah le Ṭhang Harhnak ihsin Pitlinnak,
  4. Van Tuah Piang ih nganmi Theih Kaunak,
  5. Kianghrol Hmingte ih nganmi Eden Zunzam,
  6. Salai Za Kung Lal ih nganmi Pian Hmang Pali,
  7. Dr Hre Mang ih nganmi Tipi thuamthum Parih ka mitthli,
  8. Keimah ngan mi Sun Khuathim le Lungsung Thuthup le Mithli Biazai Vol 2 pawl an si.

Calai lam ih hna ka ṭuan mi pawl cu Malaysia ih umlai 2011 kum thok ihsin The Chin Journal timi cahmai 24 nei journal pi cu zarhtin kan rak suah ih USA ka fehhlan tiang kan suah ih cuhnu khalah peh vivo a sinan rem cang nawn loih kan cawl. Chin Journal timi kha a neta ah The Chin Times tin kan thleng sal. USA ah kan pehsal nan rei daih loin 2012 October thla ihsin kan cawl. Cule kumtin Chin Biazai siarnak kan nei ih tu kum kan tuah thei a sile a vei 5 nak kan tuah ding. 2008 kum, Malaysia ih um laiah Lungsung Thuthup le Mitthli Biazai timi cabu ka rak suah.

VCTH: Nangmah tla nunthuleng na ngan ve ti kan thei ih, uk ziat lai na ngan zo? Nunthuleng na ngan tikah kan Laimi nih ziangtin an lo response?

Salai Maram: Nunthuleng hi ka ṭhehfel zo mi cu pali a si zo nan ka suah ngah zomi cu pakhat lawng a si. Ka ca nganmi hnak in midang ih nganmi suah ding hi thupi ah ka ret. Ka nunthuleng le ca dang ka nganmi parah kan miphun cun in thei hrih lo tin ka hmu. Ka no deuh lai si ding.

VCTH: Himi Salai Publisher hi hmailamah Register tuah vek teh na tum maw?

Salai Maram: Himi Salai Publisher hi register tuah thei dinhmun a si leh ding cu saduhthat rori a si. USA lawng siloin Kawlram khalah tumtahnak le sunmang tumpi cu a um cia.

VCTH: Hmailam ah ten kan calai thansonak hrangah ziangvek tumtahnak na nei? Calai lam kan ṭhangso vivo thei dingin ziang kan tuah le a ṭha?

Salai Maram: Kan Calai ṭhansonak dingah a malbik kumkhat cabu pathum suah vivo kan tum. Cumi cu a malbik a si ih cuhnak ih tam kan suah thei le kan suah vivo lai ding. Chin mi kan calai ih kan ṭhanso thei ding cun kan casiar rori a tul ih cui kan casiar mi ihsin cangantu lole canganmi parah kan ruahnak kha zalen zetin kan ruah khawm awk a ṭul. A ṭha lomi cu ṭha kan ti lo vekin le ṭha kan timi cu a ṭhatdan vekin kan lawm awk a ṭul. Cuti siloin siar lomi khal ṭha tuk, thiam tuk kan ti ringring awk sung ahcun kan ṭhangso thei dah lo ding.

Na ruahnak