SIR COM

Home » Cahram » SIR COM

By vcth on June 10, 2013.

Aug 21, 2006 ah Payap University ah tlawngkai dingin Chiangmai ah ka thleng. Thleng pek te ti cu khoi khal ka vak suak lem lo. Kan a sawng (dom) le tlawnginn cu hrawng lawng ka hleh ka ṭheu. Zarhkhat hrawng a reihnuah Laimi hrekkhat thawn kan tongaw ih an hnen lam tla a len ka thiam.

Tlawngta ka si bangin ca cu a tam thei zet. A caancaan cu kan saza tein in ti hrim maw si hi tluk lawmlam ca tam in tuah ter tin ka thin a heng ṭheu. Cangannak hrangah Computer ka nei lo ih ka baui thei nasa. Kan tlawng library kha le 8:00 am – 6:00pm tiang lawng an ong. Sun-ah le tlawng kan kai fawnih lab ta computer ka hmang man lem lo.

Sir Com

Computer ka ṭul zia cu ka rualpi pawl ka sim. Ka rualnu pakhat ih a pa in computer ṭha lem lo, a hlun zet thlang mi a nei. A hman nawn lo mi a si ih, na duh le hmang aw in ti. Kei tla in lungawi zet in ka cohlang.

Cui Com cu ka ong tinten ‘tret’ ti a awn ta hnuah window a ong aw thok. Ka rualpa pakhat kha ziangruangah ka Com ka ong tinten “tret” tin a awn ti ka sutih a tar tuk thlang ih si in ti. Ka Com te cu ka duhdawt nasa. Amah ruangah ca, assignment pawl tla tik cu caan khel in ka ṭheh thei.

Ka Com cu a tar zet vekin a hnu zet. A caancaan le a taar, a heng ṭheu. Cuvek caanah a thintawi nawn in a dangdang hmet (click) ruri le cu cem si ko, phitih a tharin ong sal le a rang sawn. Ca tam zet caan, zam rang ka duh caan tivekah a taar pangah cu ka thinheng thei nasa. Von nuai ciam co ka hair ṭheu. Cutiih ti ding ngaingai le ka siang fawn lo. Ziangah ti le ka neihsun te a si.

Thaten ka ruat sal. Ka Com in ziangtik hmanah vansiat, vandauinak i thlak dah lo. Amah le tawk ten ṭhathnemnak, ka tlawngkai ṭhehsuak theinak hrang ih i bawn tu pakhat a si rero ko. Com tar zet a si vekin a hnu zet ti lawng si ko.

Kei hi farahfa ka si. Farahfa lawng silo in keimah hrimhrim tla mifarah ka si fawn. Caan tampiah ka dinhmun lungkim aw lo in ka um ṭheu. Thaten ka ruat sal. Ka farah nan tlawng tla ka kai thei, hna tete tla ka ṭuan thei. Milain pawl le ram cangkang mi pawl vekin ka nun nunnuam zet cu asilo nan a mah le tawk ten hmai a nor ve rero ko lo sawm tin keimah le keimah duhdawt awknak, cohlang awnak thawn ka lung i fim ter.

Mi dang Com, dawrih computer tivek ka hmang le cu an rang thei zet. Voikhat ka met ve ten a ra suak cih vuahvo. Kei ih Com cu silo, thinsau ten hngak ringring a tul. Ka thin a tawi thei zet nan thintawi le a roh sinsin ti ka thei ruangah tiṭunto ten ka hngak. Neta ahcun cui ka Com te cu thinsau i zirhtu ka sayakyi tiah ka ko. Mirang pawl daan takin SIR ka pek ve.

Computer thar tla ka lei thei lo. Tuni tiang cui Com tar te, ka Sir Com cu ka hmang ve ringring lai ko. Tu-ah cu ka rualpi ṭha pakhat, hnaṭuanpi pakhat vekah a cang. Ziangtik tiang kan kom aw pei maw! Ziangtik tiang hna kan ṭuan tlang pei maw!!!!!!!!!

Francis Cung Bik

PS: Oct 21, 2009 ta

Na ruahnak