Spain ram a tthen aw pei maw?

Home » Thuthang » Leitlun Thuthang » Spain ram a tthen aw pei maw?

By vcth on October 2, 2017.

Spain ram nisuahnak saklam ramthen 4 kom (Barcelona, Girona, Lleida le Tarragona) Catalonia cu Spain ram ihsin zalennak ngah dingin referendum ah vote 90% in an neh.

Spain cozah cun mezung pawl le referendum ih vote pektu pawl hnaihnoknak a pek. Cun Spain cozah in hi referendum cu tazawin a silo tiah an ti. Cutiih an ti ruangah Spain palik le Catalonia mipi lakah buainak a suak ih mipi 850 lenglo hriamhma an tuar.

Catalonia hmun ah minung 7,600,000 tluk an um. An khawpi bik cu Barcelona a si. Barcelona cu Spain ram ih khawpibik 2nk le Europe ram ih a tumbik 6nk a si.

Catalonia cu Spain ram ih pursum leilawnnak hmun tthabik a si. Tipi kap tluan ah an um ih Spain ram hmun dang pawl hnak in an sumlut le sumtuah a ttha sawn. Kumkhat ih mipakhat ih an sumlut (GDP) hi $33,580 tluk a si.

Catalonia hruaitu pakhat a simi Carles Puigdemont in, “Tusun ah Spain cozah in ningzakza cahmai pakhat santhuanthu ah an ngan. Catalonia in zalennak ngah in Republic ram ngah theinak ah nehnak kan ngah. Kan mipi pawl zuamnak le tuarnak hi a lak a silo ding,” tiah a ti.

Spain cozah cun Catalonia hi zalennak pek a duhlo ruangah hi tiih a cangvaihnak a si. Hmailam ah ziang an bang ding ti cu thlir vivo ding a si.

Na ruahnak