.
Kumkhua hrang sunmang pakhat te lawng ka nei. Cui’ sunmang cu tlun khuh a neimi inn ah ihkhun thawn it ngah ding ti si.
.
Ziangruangah hi vek sunmang ka neinak?..Kei cu India ram Kolkata ah ummi kutdawh pakhat ka si ruangah.. Ka sauk hnu a rei lo te ah ka pa a thi..ka nu thawn kan pahnih lawng kan um..kan nih cu zin kerkawm tei’ ummi kutdawh pawl kan si.
.
Ka pa in thih san hlanih zinkap ih a sar ta mi thingpheng te kha pharlam ben in plastic te thawn a tlun in khuh sak ta mi inn ah kan um..ruahtak zet in a sur caan ah cu kan ciar neknek siko.. Kannih tla cu a vantha pawl kan si lai. A hrekkhat nauhak pawl zangfah an um nasa.. An hnen ah thli le ruah kham tu thinpheng an nei velo.. Zantin lawngfangkheh lamzin par ah an it. Ruah a sur le beunak ding heh leh mang in an hawl.. ol lo.. Dawituar caan tla an tong bet theu.
.
Ahlan ah cu ka nu le ka pa umnak inn an rak nei ti ka nu nih in sim. Ka pa cu lekuang a tuah dah. Kumhnih kumthum pehzom in a sung tikah caw, cule lekuang tuahnak leihmun,netabik ah kan inn tiang kan zuar theh..cuisin Kolkata tiang ke in kan vai..kan vai a rei hlan ah ka upa le ka unu a sangsang in an thi..ka pa hnatuan phunkim a tuan. In neih (hrin) hnu a rei hlan ah ka pa cu a na ih a thi lala. Ka pa a thi tikah ka nu cu kutdawh tuan in a pum a cawmaw. Kei tla ka upa ih zirtul lo’n kutdawh dan,dil dan ka thiam cih ve.
.
Ka van a ṭha tuk..Kolkata ih a tumbik Hotel hmaiah kutdawh ka tuan ngah, Ka dil thei. A zin kiangkap pawl cu si rang thuhmi banṭhuam pawl thawn an kham..a hotel pi tla a zate’n a var ṭheh ih zoh a mawi nasa. Mikhual pawl cu motor thawn an ra, an mal ve l, an hnen ah ka dil. Ka ralring(ka thei ngah) mi cu mikhual pawl lakah nisuahnak lam pawl hi an tirh a siang sawn..nikhat ah 10 rupee (US dollar pia25) hrawng kan ngah. Voikhat cu nisuahnak ram lam in ra pa nih rupee 50 in ṭhen dah.
.
Ahlan thlathum hrawng ah ka nu besia tak in a na..ka nei sumsaw thawn ei ding a thawbik pawl ka pek nan ka hlawhtling lo. Anetabik ah cu ka nu nih mother Teresa a dinmi harsa bawmnak innpi ah in hruai thei sehla kilkhawi tu ṭha tla ka nei men thei. Ka dam le ka lo rak hawlsal ding tin thu in cah..zan a thleng ih ka nu hruai in kan suak..ka nu cu lamlai ah ka tanta ih kei cu thingkuung pakhat phen ah rel phah in ka bih..besia tak in a na mi ka nu cu mipawl nih an hmu ngaingai..mipawl cu motor pkhat an kham..motor mawngpa cu ka nu a baal tuk fawn ih a phur paih lemlo a bang..rei nawn an biak awk hnu ah “Jia li Jia”biakin feh ding an lungkim..cunah ah mother Teresa ih innpi um.
.
Cu hnu ka nu cu a rak kir nawnlo. Ka nu a thi zo ti cu ka thei. A thihhlan sister pawl in ṭhate’n an kilkhawi ding ti ka thei. Kei teh?..mah lawng umhar lungleng cu ka tuar..”pa tla ka nei nawn lo..nu tla ka nei lo..in zangfah uh”timi ṭongfang lobak ṭongfang dang ka nei lo. Zantin rawl ka va leinak dawr neitu pa nih le in biak paih lemlo in ka thei..mahlawng umhar lungleng tuar tu kei cu rualpi tin ti ding ah zan ih rawl a hawl ṭheumi zinghnam pakhat lawng ka nei..ka rual zinghnam ei ding buhfang cu nitin ka tan sak ṭheu. Zinghnam te cu ka par a rak kai ih ka kut in keu ṭheu..kei cun ka hnam. Cutin kan it tlang ṭheu.
.
Mibur khat kan lamzin sung an rak ra ih hmunkip ah si an toih ciam. Cui zaan ka zinghnam te khui lam a hlo maw thei hlah rawl a rak hawl nawn lo. Neihsun rualpi a hlo tikah ka thin a nuam lo zet. A thaisun ah ka na cih..ka na tin ka theiawk ko nan Hotel hmai cu ka feh ih ka va dil lai. Sun a thleng cun ka tuar nawn lo. Ka tlung ih ka it. Cuhnu ka luak. Zaan a thleng tik ah hmaikhuh bun in mihrek khat an rak thleng. Motor ah in phur..motor par ah keimah vek a na ve mi kutdawh pawl an tam nasa..ka na ko nan a hmaisabik motor ka tongahnak a siih ka nuamawk zet..motor sangkate ihsin a leng ka cuan. Khua ka thlir. Khuapi thawn a hla deuhdeuh ih khuate pakhat kan thleng. Ka nu leh pa te pawl khuate ah an um dah timi in sim dahmi ka mang sal..ka nu te um dahnak leihmun umseh la a ṭha zet ding nan tin ka ruat rero.
.
Innpi pakhat sungah kan thleng ih mihrek khat nih ka thi in zuk..a hrekhat minung pawl an hruai cih ih a hrekkhat cu an tang..ka nunsung ah hmaisabik tikholh fai sak mi ka tong..kut tin in tan, sam tla in met sak..um a nuam deuh tin ruat ding a um nan hmaikhuh bun lo thei lo’n in bun ter. A tlunkhuh thawn a ummi innsung ah ihkhun thawn ka it ngah tikah ka nuamawk hngin. Ei in ding tla in rak keng sak..nan ka nanak cu a besia zet.
.
Hipawh hi ziang ah ka par ah hitluk in an ṭha? Ziangruangah ihnak khan sung ihsin a leng in suak siang lo?..ka theithiam thei lo..ka thazang mallai a khatdeuh ni ah in kil tu pawl thei loin a leng a thup te’n ka suak..in kai ngah sal cih ih in thawi tum tiang an thinheng..hinah hmun ih um tu poh ziang ah hmaikhuh an bun, kut hruk pawl ziang ah an hruk timi ka theithiam lo..ṭongkam kamkhat hman tla in biak dah hailo..kutdawh pawl ziang an siar lo cu mangbang dingciamco cu si lo ee.
.
Zaan ah thlisia a hrang..ruah a tak nasa..ihkhun parah ka it..natnak ruangah ka taksapum zate’n um a nuam lo nasa..sinan nuam awkvek in cu ka theiawk..hi ruah,hi thli nih in ciar ter ban nawnlo..ka kiang ih mina pakhat mizan ah a thi zo..puanvar an sin ter ih an keng..ka thinphang ka lau ding an phang ih si ding dim tete’n, nuam tete’n an tuah..tucu nat besia biktu mina kei mah ka si thlang.
.
Sibawipa nih in rak haal tinte’n a lu a thing..ka itthat le ka ṭhangsal nawn lo tla cang thei..sister nu pkhat ka ihkhun hmai ah ding in ka kut fek te’n in kai..hmaikhuh cu a bun ko nan kut hruk cu a hruk lo..ka kut in kai tu sister mit ah mitthli pawl an for zik..ziang ah si pei a tap?..hih hmun ihsin ka tlan nawn lo ding tin a thei ih si pei maw?..hih hmun in ka tlan le kutdawh ka tuan sal ṭul ding si..kumkhua kutdawh ah ka cang ding si..kei cu sungkhat ka nei lo..rualpi ka nei lo..ka kut tla zohman nih in kai dahlo..cui hmun cu ka kirsal le ziang ka tuah ding?
.
Ka lungkim nasa ko..khuh a neimi in pakhat sungah ihkhun thawn it ka duhzet mi ka sunmang a rak kim ih ka lungkim ko..thinlung ṭha sibawi leh nurse pawl parah tla ka lungawi zet..asinan ka thei duhmi pakhat cu a hlan mifarah pawl an na le zohkhen tu an nei lo nan ziangruangah kei hi a hleice in zohkhen ka tuar ti hi si.
.
Ka takpum an derdai thlang, thazang tla ka nei nawn lo..ka itthat hlan tiang ka nu, ka pa, ka uu, ka nau, sibawi, nurse, sister pawl ziangtik hman ah an suah ihsin kutdawh cang lo ding in thla ka cam sak..ka itthat hnu ka ṭhangsal nawn lo men thei..ka hrang ah riahsia in um hlah uh..ka lu par ah khuh a nei mi innpi a umzo..ka zangtang ah ihnuam zet ihkhun pakhat umzo..kuthruk a hruk lomi kut thawn duhdawtzet in kai tla ka tuar zo..ziang ah lungkim thei loin ka um ding??
.
SAN TINGRISET
.
hminsin: Taiwan cangan thiam Li Jia Tung ih ca let mi a si..
