VANCUNG THAIHLIO

Veikhat cu siizungpi pakhat ah mina pahnih cu khaankhat sungah an um tlang. An umnak khaan fate sungah sangkate pakhat lawng a um. Cuih mina pahnih cu na menmen si loin dam lo besiazet veve an si. Mina pakhat deuh cu sangkate kiangah an retih zaanlam tinte’n khua a cuan ringring. Cuticun a ni, zarh le thla in an rak um tlang.

Sangkate kiangih umtu pa cun nitin a cuap sungih tidai pawl pipe thawn an dawpsak hnu ah nazi pakhat sung hrawng sangkate kiangah to dingin caan an pe ṭheu. Sikhalsehla a kiangih um pa cu a to thei ve lo ih it ringring ṭulmi a si. Sangkate kiangih ittu cun cuih sangkate ihsin a hmumi pawl cu a rualpa hnen ah a sim ringring. “A lala… a va mawi em! pangpar dum tumpi pakhat a um so khaw. Cule nauhak pawl pangpardum ah an lek rero, an nuam aw nasa. Fale le tlangval pawl khal a kopte’n an vak tlang, an kut tla an kai aw. Pangparmawi phunkim thawn a mawi ngaingai. Rampei nu fa rual tla tili ah ti an leuh, van ah khangro tla a phir roriin an um, a lalala… an mawi dan cu a makzet so khaw,” tiah a phunphun in a sim ṭheu.

A rualpa cun ngai nuam a ti nasa. A simmi pawl cu a lungsungah a cuang ter ih nuam a ti aw ve nasa. A mawizia cu a thinlung mit in a hmu ngah thei ve. A lungawizet. Asinain sangkate kiang ih um ngah ding cu a duh zet, ziangahtile cutivek ih a mawimi thil pawl kha hmuh a cak tuk ve. A mit rori in hmu ngah ding a hiar tuk. Tho in va zoh ding le a tho thiam lo. A rual sangkate kap ih a it ngah cu mi vanneizet a si tiin a ruat. Curuangah amah khal cuih sangkate kiangih it ngah thei dingin ka tum a ṭul a tiih it ngah theinak ding thu a phunphun in a ruat.

Ni kum tlawngpit ah kan sung ten mawtaw thawn khual kan tlawng. Lamhla fehnak zinpi a si vekin mawtaw pawl cu zinpi khat in an tlan celcel. Ka nupi le ka fapa pahnih thawn kan si.

Kan mawtaw sungah khuai pakhat a um kha kan nu nih a hmu thok ih lau zetin a au, “Cawl aw, mawtaw sungah khuai a um, cawl aw!”

I ti vekin cawl sehla dunglam ih mawtaw pawl nih a dotdot in in taik tengteng. Mawtaw thlalang ka thlak ih khuai cu a mah ten a pawt hlo ko.

Ka fa le nih, “Pa, nang cu ziangvek khalah lau tin a nei lo ti” in ti.

Thinphan hnuaihni le lau tivek pawl ka nei nawn lo nak hi leitlun ralpi vio 2 nak ih ka hmuhtonmi pawl ruangah an si. Ral hi minung hrangah hlawknak pakhat te hman a suahpi lo hleiah minung pawlih lungput tla a siatsuah neknek. Ral ruangah thih le nun in mah inn le lo tansan in sukso ah an tlan. Phannak le launak pawl thawn khua an sa.

Ralpi 2 lai ah B2 vanzam pilot ka rak si. Hih vanzam phun hi mawng a har ngaingai tiah a hmin a thang. Ral ram feh hlan ih mawng cint men ah a tlak in a thi mi an tam sawn ti si.

Zan tin ka mang a sia, ka lau, ka it thei lo. Ka vanzam par ih ka rualpi ralkap 5 ih nun pawl ka hum thei pei maw ti ruahnak nih ka thin i bang ter ringring. Pilot bawmtu, bomb thlaktu, cet meithal kaitu le vanzam zinhmuhtu ti pawl an si. Kum 21 ka si ih an zaten ka hnakin an nauhak sawn.

Germany ih a vio 1 nak bomb kan va thlak ṭum hi ka hniglh thei lo. Bomb kan thlak ih kan kir lam cu ka lau, ka thir, vanzam hman ka mawng thei lo ih i bawmtu kut ah ka ap.

Ka thinlung dai ding ko ka zuam ih cutin vanzam cu ka mawng thei sal. Zirnak tumpi ka ngah ta riai, cu hnu cu ziangvek harnak ka tong tla le ka thir nawn ta lo. Tuah dingmi pawl thin dai ten ka tuah vivo mei.

Mah le mah rinsan aw nak tla ka nei sinsin. Van ah siseh, lei ah siseh, tipi sungah siseh, ziangbang harnak kan tong tla le thin dai ten tuah dingmi pawl felfai in kan tuah thei ding hi a thupi sawn ti ka hmu suak.

Vio khat cu minung umnak khua thawn peng 27 hlatnak ah kan mawtaw a siat. Beidong in an um cio. Kan nu hnenah, “Ziang an cang” ka ti.

“Na thei ko ual, mi um lo nak hramlak ah kan mawtaw a siat hi”

“Thei ee, cucu ziang poi” ka ti.

Ka fa le hnen ah “Na pa nih i to ee” tiah a hei auh hngai. Ka fa le hnenah, “Zoh hnik uh, kan mawtaw hi van par pi 20,000 lai ah a siatmi a si lo, mawtaw zin parah a si ko, cu le ral ram ah a si cuang fawn lo, kan mah ram sungah a si.”

Ka sim duhsan an thei lo men thei. Ral ram ah vanzam siat ih kan ṭum ṭul can ah thih le nun in kan tlan. A tu ramsung, peng 27 hlatnak fangih mawtaw siat men tla cu! Thin har ciamco ding le beidong tuk ding a tlak deuh lo in ka hmu. Kan rem ding ih a remcang cing ko lo ding maw! Ziangtin na hmu ve? A hmuhdaan na thiam le cu thinhar tuk ding a si lo na ti ve ko ding.

Na mawtaw sungah khuai a lut pang maw! Thlalang thlak men ding a si ko, a remcang mei ding.

By JohnLSL

Source:

: A Feeling For Priorities by Arnold Benson

Voikhat ah nauhak pa pakhat tili ah a pil. Ti ih pil ti cu pil thul, phun thul in a um. A phun aw caanah in run uh tiah a au.

Rinlopin a tili kap ah mi pakhat a thleng. Cupa cu tili ah a dawp ih nauhak pa cu a run.

Nauhak pa cu ti tawkfang a dolh ngah. A thei aw lo. Mipa in a tuamhlawm. Caan tawkfang a rei in nauhak pa a lung a fim. Mipa cu a feh zik. Nauhak pa in a ko ih mipa hnen ah, “ka lungawi” tiah a ti.

Mipa in, “ziangah na lungawi” tiah a sut. Nauhak pa in, “ka nunnak i run ruangah” tiah a sawn.

Mipa cun nauhak pai’ mit ah fiang zet in a zoh ih, “na upa tikah run a man mi nunnak neitu si ding in zuam aw,” tiah a ti.

Source: Is your life worth Saving?

Viokhat khua pakhat ah ti a lik. Khuapi an senpi in khua dang ah an beu. Nan Pathian zum zet tu pacang pakhat cu a tlan duh lo. “Pathian nih i bawm ding, amah lawng ka zum, ka rinsan” a tiih hmun dang ih beu le tlan a tum lo.

Tilik cu a sang, a roh vivo. A umnak inn a pil. A sang deuh mi inn ah a thawn aw. Bawmtu lawng a ra. ‘Rak ra aw, kan lo run ding’ tiah an ti. “Pathian in i run ding, amah lawng ka zum” tiah a sawn.

Tilik cu a roh deuhdeuh. An khua ih innsangbik zim ah a kia. Helicopter in bawmtu an ra. “Pathian in i bawm ding” a tiih a el thotho. Cutin tilik ah a thi ta.

A thih hnu-ah vanram ah Pathian thawn an tong aw. Pathian parah a thin a heng ngaingai. “Hi tluk ka lo zum nan ziangah i bawm lo” tiah a ti. Pathian in “nangmah bawmtu ding ah lawng pakhat le Helicopter pakhat ka rak thlah nan” tiah a sawn.

Caan tha, caan remcang (Opportunity) kan ti mi hi na ruah vek cekci in a ra lo men ding. Ruahsan, hngak, thlacam ti pawl hi thil sual an silo nan na ruah vekin thuletnak (a phi) na ngah lo tikah beidong lo in a zoh daan thiam sawn aw.

LUCK FAVORS THOSE WHO HELP THEMSELVES a remcang dan ih lehmi

Voikhat ah vate pakhat khual hlapi tlawng ding a si. Thlatang khuasik ih khual hla tlawn ti cu a ol lo. A dai tukih a thla hmuah a khal, a ṭhong thluh ih a zam thei nawn lo. Lekuang ah a tla ta.

Caw pi nu in rinlopin a parah ek a rak thlauh. Caw ek cu a hlum zet, a khu hluah hlo. Cui a hlumnak in a khal, a ṭhong mi vate ih thla pawl cu thitha thar a pek. Vate te tla cu maltete a ai thei. Tawkfang in a aw a ring deuhdeuh. Cutin a lungawi tukih hla a sak ciamco. Lekuang neitu te’i zawhte in ziang awn si tiah a hlethlai. Caw ek lakih vate a hmu suak ih a dehthat ta pa lo maw.

Vate cu tlunvan ih um an si. Hih vate in a umnak a hngilh. Aw ring tukih um lonak ding hmun ah a aw a ring sual. Cui thil ti sualnak in a nun a cem ral ter.

Viokhat ah a farah zetmi nupa te an um. An nu ih sam cu a mawi in a sau zet. Nikhat cu an pa ih hnenah samhriatnak dingah thiathih lei sak dingin a ngen. An pa nih cu thin nuam lo zetin a cang thei lo ding tiah a el.

A nazi hri catmi a thlengnak ding le remnak ding hrangah tla paisa a nei lo thu a sim, cun a hnattuan lam pan in a feh. Lamzin ah nazi zuarnak le remnak dawr a hmu ih a nazi cu man ol ten a zuar, cun, an nu ih hrangah thaithih cu a lei.

Zanlam inn tlun ding a thatho nasa, an nu ih duhmi te a lei sak ngah ih a lungawi zet, a nupi tla rinlopin a duhmi a ngah dingih a mangbang in a lungawi daan ding ti pawl a mitthlam ah an lang celcel.

Nan, inn a va thleng ngai tikah a mah sawn mangbang in a um. An nu cu sam tawite ah a cang. An pa hnattuan sungah a sam cu tan in a zuar, cun, an pa hrangah nazi thar a lei sakmi cu a kut ah kengin a pasal cu a hmuak.

An duhdawt aw zia kaa in sim le rel bet ding a um lo, an mitthli a luang veve.

Israel fala nu in Palestine nauhak pa ralkap pa’i sit le velhnak in a run mi thuthang, thilcang in leitlun mipi tampi’ mit a vang ter lawng si lo in Palestine le Israel mipi pawl ih thinlung sungah thusuhnak thar a suak ter.

March 20, 2012, Jerusalem ni a si. Israel mi pawl hrangah Jerusalem ni cu ni thupi zet a si. Israel thantar an thlir ih an rampi hla sak phah in Jerusalem Biakinn pi lam an pan.

Jerusalem ni a thlen tinten Palestine mi hrekkhat in an buaipi ve theu. Curuangah Security ralkap le palik pawl tla a tam celcel.

Kum 10 luan Palistine nauhak pa te in an Palestine thantar keng in Israel ramri ah a ra ve. Israel tlangval pakhat in a thantar a long. Palestine nauhak pa te tla cun a thantar ngah ding in a dil. Cutiih an long aw rero mi Israel ramri ralkap pa pakhat in a hmu. Ralkap pa in cui hauhak pa te cu kaih a tum. Nauhak pa tla a tlan. Ralkap pa in a dawi. A man in zangfahnak lungthin tel riai lo in a sit a vel.

Cui thil cang a hmu tu Israel phunsang tlawng ta fala nu, Sahar Vardi, kum 22 in va luthnawh in a kham. A hmu tu mipi tampi an um nan hi fala nu lawng in ralkap pa’i sit le velhnak ihsin a kham ih Palestine nauhak pa te cu a tlan suak thei.

Israel mi pi hrekkhat in a soisel ruri nan Palestine mi pawl in cu cuti pumpek ih Palestine pa te a run tu tiah an lawn. Facebook ah tla a tha lam in an comment nasa. Hi thil hi santhuanthu sungah Palestine mi pawl in Israel mi parah a tha lam zawng ih an comment hmaisabik nak a si.

A dik tiih na ruat mi cu tuah aw, na mipi pawl ih soisel ding tih lo in. Khawihmun, ziangvek dinhmun ah khal thudik lam ih din thei ding hi a thupi.

Israel pa in Palestine nauhak pa’i thantar a long

Israel Ralkap pa in Palestine nauhak pa a hual

Israel Fala nu in Palestine nauhak pa a run

Ronmi: 972 Mag

Kum 11 nauhaknu te in a pa hnenah, “Kum 15 ka kim tikah ziang laksawng i pek ding?” tiah a sut. A pa nih, “ Ka thei hrih lo, rei tuk a duh lai ual” a ti.

Kum 14 a luan a fala zikah nunaunu te cu rin lo pin a tluk ih sizung ah zamrang ten an kuat. Sibawi pa nih a zohfel hnuah a pa hnenah a lung a dam lo tuk, hitin cu a nun a peh thei nawn lo ding tiah a sim.

A fanu te cu sizung ihkhun ah beidong zetin a zau, cun, a pa hnenah, “ Ka thi ding ti an lo sim ko lo maw?” tiah a sut. A pa in, “ Na thi lo ding” tiah a let. A fanu in, “Ziangah cutin fiangten na sim thei?” A pa in, “ Ka thei.”

Kum 15 a kim ah fala nu te cu a dam vivo ih sizung ihsin inn lam a pan. A ihkhun parah a hrangih ca tanmi cu a hmu.

“Ka fanu, hih ca na siar tikah ziangah na dam tengteng ding ti ka lo tinak a san na theifiang zo ding. Hlanlai ah i sut dah, ka kum 15 kimah ziang laksawng i pek ding tiah, ka lo pek ding laksawng hi ka nunnak a si ti ka rak thei lo.”

A pa nih a duhdawtmi fanu hrangah nunnak liam in a lung a pek si cu!

John LSL

Voikhat ah a duhham zet mi siangpahrang pakhat a um. A inn tang leihnuai khan sungah sui lawnglawng a khat. A sun a zaan in a innhnuai khan ah a sui pawl siar le zoh in a caan a cem.

Voikhat cu rin lo pin Vancung fala pakhat a hmai ah a rung phuang lang aw. Na duhmi i dil aw, a takah ka cang ter ṭheh ding tiah a ti. Siangpahrang pa cu a lungawi ngaingai. Keimah hnak ih mi vanṭha leitlun ah an um nawn lo ding tiah a ti aw rero. Siangpahrang pa ih a dilmi cu “a tham mi hmuahhmuah sui ih cang ding” ti a si.

A thaizing a tho in a ihkhun sui ah a cang. A lungawi nasa. A puan a hlip ih a puan sui ah a cang. A siahhlawh pawl in ei in ding an pe. Apple a ei zik. A ei man hlan ah sui ah a cang. Ca a siar tum. Cauk a kai veten sui ah a cang lala.

Cutin rilrawng le tihal in a ṭap, a ai a hram. A fanu duh in ‘ka pa ziang na cang’ a tiih a pom. Rinlopin a fanu sui ah a cang. Cutin siangpahrang pa tla rilrawng, tihal le a fanu zuun ngai in a thi ta pan lo maw.

Ngah na duhmi thil na hrangah a ṭhabik mi an si lo men thei.

Voikhat ah Tinbawta (Sailor) pakhat lawng pakhat ah kum thum sung hna a ṭuan. Zaan khat cu a duty caan ah zu a ri. A hnaṭuan kum thum sung ih a voikhat zu a ritnak a si. Captain pa in lawng cabu ah “Tu zaan, hi Tibawta pa hnaṭuan caan ah zu a ri,” tiah a ngankhum.

Tinbawta pa in cui ngankhum mi a hmuh tikah a thin a nuam lo, a hmailam ṭhansonak a phit tu a si thei tiah a ruat. Captain pa hnen ah ngaithiam a dil. “Zangfahten cabu sung ih na ngankhum mi ah, kum thum sung ah a viokhat zu a in nak a si tin in bet sak aw. Cu lo le mi in zaan tin zu in ah in ruat ding,’ tiah a ti. Captain pa in ‘a ngah lo thudik cu thudik a si’ tiah a sawn.

Zaan khat cu Tinbawta pa ih Lawng cabu a ngankhum caan a thleng ve. A ngankhum mi cu, “Tu zaan kan captain pa zu a in lo,” ti si. Captain pa cu cui ngankhum mi a hmuh tikah a lung kim lo ngaingai. Tlangval pa hnen ah a feh ih, “Captain tu zaan zu a in lo ti cu, zaan dang zu in ringring ah mi nih in ruat ding. Zamrang ten na ngan khum mi rem aw tiah a ti.” Tinbawta pa tla cun, “thudik cu thudik a si,” tiah a sawn ve.

An ngan khum mi cu a dik veve ko, asinan thu hla phun dang, ruah sualnak ah a feh pi thei. Thudik kan sim tikah hrulh-hram lo ding a thupi.

Source: BEWARE OF HALF-TRUTHS OR MISREPRESENTATION OF TRUTHS