Teimaknak in Dinhmun Pakhat a Suhpi

Home » Cahram » Teimaknak in Dinhmun Pakhat a Suhpi

By vcth on October 21, 2010.

Francis Cung Bik

Innsung ih um malte ka khop deuh ih in hmailam ah cauk pakhat le tokheng pakhat thawn ka ca sairnak hmun ka ṭhin. Ka to, ca ka siar, ka hmai ah cu kan sangkapi 20′ hrawng a sau mi lawng a um. Voikhat voihnih khua ka tang phah. Sangkapi parah nuam teten a zawh nuarno mi Kharkhem te ka hmu. Kharkhem cakvak lemlo te a si. Ziang ka siar lemlo. Nazi hrek hrawng ca ka siar, ka zoh sal. A rak zawh ṭheh man. Ka rauhnak hnak in a rang. Zinghnam in Minute 1 ah a zawh ṭheh ti sehla ka mangbang lo ding. Cui ka kharkhem te ih a speed cu a nuar ti ka thei ih ruangah ka ruahnak hnakin a rak rang ka tinak a si. Kan nauhak lai ih Kharkhemte thu, Cumkheng le Sabek thu kan zir mi pawl i mang ter ṭheh.

Thil pakhatkhat thiam ding ah hi talent a thupi tuk in kan ruat ṭheu. Kan talent, kan ti thei zawng a si lem lo ahcun ka nor lem lo. Talent cu a thupi lo cu a silo nan ka zum mi pakhat cu kan zuam fahran-ah cu cin le ri pakhat tiang cu kan thleng thei ding ti ka zum. M Div ka kai lai ah rual ṭha pakhat ka nei. Tluanga tiah kan ko. Amah hi cathiam zet, mi bright zet a si lem lo. Thu thei, cing rang ti vek ah tla cu a hnakin ka cingkeng rang deuh. Nan a zuam nasa, ziang hmuahhmuah ti fekfek in a timtuah. M Div kan ṭheh tikah cu a nih cu outstanding student ah a cang. A hnak ih bright kan nih pawl cu a dung ah kan tang ta.

Nang tla rualpi cu vek, lole tahṭhimnak sim ding tete na thei ko ding ka zum. Khah, zuamnak ti hi a thupi nasa. Kan theih a ṭulmi, kan ṭhiam a ṭulmi, kan zir a ṭulmi pawl na thiam zawng, na talent a silo hman ah zuamnak le teimaknak thawn hmainor uhsi. Teimaknak in dinhmun pakhat a suahpi, cu vekin Pathian tla in miteimak cu a thlawsauh duh ve.

Na ruahnak