Thai Siangpahrang ruakvuinak ah Myanmar President feh ve

Home » Thuthang » Leitlun Thuthang » Thai Siangpahrang ruakvuinak ah Myanmar President feh ve

By vcth on October 27, 2017.

Myanmar rampi President U Htin Kyaw le a nupi Daw Susu Lwin cu October 26 ih Thai siangpahrang bawipa ih ruakvuinak ah an va tel ve tiah theih a si.

Thai Siangpahrang Bhumibol Adulyadej ih ruak cu Thailand caan zaanlam nazi 5:00 ah mei ur in vui liam a si.

Hi ruakvuinak ASEAN ih ram hruaitu pawl, leitlum hmun dangdang ih lalhrin pawl, hruaitu pawl tla in an telpi.

Siangpahrang Bhumibol Adulyadej cu Siangpahrang si in Thailand ram cu kum 70 le ni 126 ram a uk hnu ah October 13, 2016 ah a nunnak a cem. Leitlun siangpahrang pawl lakah a reibik ram uktu a si.

Siangpahrang Bhumibol Adulyadej cu 5 December 1927 ah Mount Auburn Hospital Cambridge, Massachusetts ah a suak.

Bhumibol cu a pa Harvard in tlawng a theh kum, 1928, ah Thailand ah an tlung sal. Kum 2 a ti ah a pa in a tasan. Bhumibol ih a pa, Mahidol Songkla, cu Siangpahrang Chulalongkorn ih fapa a si.

Bhumibol cu a pa a thih hnu in a nu in ramkhel thu ah a telter duhlo ruangah a upa thawn Switzerland ah a vai pi.

Thailand Siangpahrang Rama VII cu siangpahrang sinak in a cawl ih Bhumibol ih upa Ananda Mahidol cu siangpahrang tuan dingin mipi in an dil. Ananda cu kum 10 lawng a si lai, nan a hmin men in siangpahrang a tuan ih Regency Council pawl in uknak an kai.  Amah cu Switzerland ah fimthiamnak a zir. 1945 December ah 1944 Asinan Siangpahrang Ananda cu 9 June 1946, a kum 21, ah a ihnak khan ah meithal thawn kap that a si, (amah le amah a that aw maw, mi in an that ti tutiang zohman in an thei lo).

Bhumipol cu a uu thih hnu in 1946 in siangpahrang ah hriak thih a si.

Siangpahrang dang vek silo in Bhumipol cu rammi a duhdawt zettu a si. Rammi farah harsa hrang ah heh le chet tin ti thei tawkin hna a tuan. Siangpahrang a sinan niling le ruahsur lakah rammi hrangah hna a tuan. Cutiih a zuamnak ruangah Thailand ram cu South East Asia lawngah silo in Asia ram ih theihmi ram pakhat ah a cang.

Siangpahrang Bhumibol Adulyadej cu mipi hrangah nasa zetin a zuam vekin mipi tla in an duhdawt zet. Thai mi tampi cun pathian fate zoh in an zoh, an upat, an duhdawt.

Na ruahnak