Tlunlam Upa Thuneihnak (Executive Power)

Home » Cahram » Theihkauhnak » Tlunlam Upa Thuneihnak (Executive Power)

By vcth on October 7, 2014.

Executive Power

Lungbawk Brother

Democratic cozah sungih hruaitu pawl cun mipi ih lungkimpinak thawn ram an hruai a si. Cumi hruaitu pawl cu ralkap tlunah thuneihnak an nei thei ruangah le pursum leilawnnak lam ah thu an nei ruangah an hnenah thuneihnak a um mi a si lo. Hrilawknak ih daan tuahmi an upat thiam ruangah le daan an thlun thei ruangah thuneihnak an nei a si sawn.

Hrilawknak theh ve te’n, mipi in hruaitu hnenah thuneihnak an pek. Constitutional democracy ahcun, thuneihnak cu t’henthum ah an t’hen ih, daan tuahtu pawlin daan cu an tuah, tlunlam upa hruaitu (EC) pawl in cuih daan cu mizapi thlun ding in an nem hnget ih, thut’hentu (Judge) pawl in daan thlun in mipi parah zalen zetin thu an t’hencat sak t’heu.

Democratic ih hruaitu pawl cu dictators (Aa-naa-shin) an si lo ih, “Dam sung hruaitu” t’uan ringring dingmi khal an si lo. Kum-tiam (Fixed term) nei ih hnat’uan mi an si. Cu tlunah, hrilawknak ih a tlingmi pawl cu midang an si khal le hruaitu ah a pom theitu an si.

Constitutional democracies ah tlunlam thuneihnak cu t’henthum ah an t’hen. Bukawton (Check and balances) mi thuneihnak cu executive, daan tuahtu (Legislative), leh thut’hentu (Judicial) pawl kutah a um. Rampi le ramt’hen uktu pawl karlak ah cui thuneihnak cu an hlawmaw ton a si.

Santhar democracy ahcun, Executive pawlih thuneihnak cu parliamentary lole presidential system tiin an hmang. Parliamentary system ahcun, MP neitambik party (majority party) ih lubik in Prime minister a t’uan cih. An party ih kaihhruainak in cozah thuneihnak a hnge tete (“executive branch of the government”) an din vivo.

Cutin, parliamentary system ah daantuahtu (legislative) leh executive pawlkom ih a hnge cu pumkhat tluk an si thotho. Zaingah tile, Prime Miniter le a tlangsuak upa (Cabinet) pawl cu parliament ihsin thlahmi an si. Cuvek hruaiawknak ahcun, political opposition pawl cu executive pawlih thuneihnak pawl zohfel saktu an si t’heu.

Presidential system ahcun president cu a dang te’n an hril. Parliamentary system ahcun party ih lubik kha direct in Prime Minister an t’uan. Cucu parliamentary le presidential system an dangawknak a si.

Presidential system ah president leh daan tuahtu cu an mah te’n thuneihnak leh political constituencies an nei fingfing ih an hnat’uanmi an bukawton (Check and Balance) ringring.

Democracy ahcun an cozah pi tlunah thuneihnak t’hent’hekawk t’heh a si nan a cakzet thotho. Asinan, khuinah can tiang thuneihnak a nei ding timi rikham an nei fingfing. Curuangah, democracy ahcun ram mipi thurel tik ah thulai bawhcat a harsazet ih tikcu a rei duh zet t’heu. Asinan thu an t’hen thei tik ahcun thuneitu pawl cu zianghman t’ihphan ding dang um lo in leh thuneihnak sangbik hmangin an thuthluk ciami parah hna an t’uan thei ve thung. (That’himnakah: ralkap uknak ahcun ralkap in mipi hrangah an mah thu te’n thuthluknak an duhduh in an tuah ih cumi t’uansuak tikah mipi soisel leh relsiat ding an phang zet t’heu. Democracy ah cun cuvek a um lo tluk a si. Thuthluknak tuah hlanah mipi le cozah lungkim tlangnak a um hmaisa t’heu tikah, thuthluknak tuah hnu ah buainak a mal)

Ziangtik lai khalah, constitutional democracy uknak ih hruaitu pawl cu “Daan ih uknak” (Rule of Law) sungin an cangvai. Daan ih uknak cun hruaitu pawlih thuneihnak ri a kham sak ih, an thuneihdan ding a simfiang sak a si.

Hminsin: Chin World Media ih September 02, 2011 ih suah zo mi a si.

Na ruahnak

One Response to Tlunlam Upa Thuneihnak (Executive Power)

  1. Benjamin   October 8, 2014 at 4:43 am

    In hlawm ttha nasa, lungawi.