Tualleng Tlawng Ka Kai Hmaisabik Ni (1987)

Home » Cahram » Tualleng Tlawng Ka Kai Hmaisabik Ni (1987)

By vcth on October 26, 2013.

Salai Van Cung Lian

Ka kum u pa vivo ih nauhak lai thuruat le legend vek a bang caan a tam zet thlang. A caancaan le ka nauhak lai khawi can tiang si ka cing timi ka ruat ṭheu. Mugyu ka kai hlan tiang ah ka cing mi a um hnuaihni nan khawi mi a cang hmaisa timi ka ruat thei lo. Minung cu thil hmaisabik kan tuah mi hi hngilh theih a silo. E.g. kan fala hmaisabik, khual kan tlawng hmaisabik, tlawng kan kai hmaisabik etc… Falam R.C.M ih Mygyo ka rak kai hmaisabik ni hi ka cing ringring lai. A ni le a thla pawl cu ka cing nawn lo nan cui ni ih a rak cang mi hmuahhmuah cu tuni tiang ka cing lai. Falam a ngai pawl, nauhak lai a ngai pawl in an thei duh pang ah tiah cui ni ih a cang mi malte ka rak ngan.

Nauhak lai ticu, tlawng ka kai ngaingai hlan ah tlawng kai ka rak phur zet. Ziangvek a rak si ti khal cu ka rak ruat cuang lo nan, mi an kai ih ka rak kai paih ve men. Ni khat cu (1987) kum cem zik lam ah ka pa nih vankau lam ah in rak hruai. Ka pa le a rualpi pawl U Aving le midang an tel hnuaihni nan ka cing nawn lo. Ka pa nih Aizawl lam in in rak sum mi boot sen te, Joy tin ngan mi jeans le angki sen (angki zal ah Kenzo) tin a rak ngan mi, ka hni puan hmuahhmuah lakih tha bik ka rak hruk. Bag fatete ka pai ih nithawng fatete ka rak keng. U Aving fapa Zaw Min Htun (Zaw min htun hi kan phun 2 maw 3 hrawng ah blood cancer in a rak thi zo) le midang Bawi Lian Cung (Acung), Bawi Hum Thang pawl thawn kan rak so in ka thei. Midang cu ka cing tuk lo nan Zaw Min Htun cu ka rak cing zet. Hmun so ah cu ka bang nawn ih ka pa in in rak cawi phah, Zaw Min Htun in “a pa nih cawi cop tin I rak ti”.

R.C Biakinn kan thleng in cu biakinn tumpi ka rak hmu tikah mak ka ti tuk. An khawnglawng (Bell) pawl ka rak zoh khop lo. Cule biakinn hmai kan lan in Far kung hring tak pawl ding zet ih phun mi mawi zetin a rak um. Cumi far kung pawl tang ah tonak (bench) tluan te sau zetin a rak um. Far kung thawn, biakinn mak tak thawn, a kiangkap le hnawm um lo fai verver khi si ih mak hi ka rak ti tuk. Biakinn sung cu kan zaten kan bih thluh. Ka pa khal R.C biakinn a rak thleng dah lo a bang. Thlalang sung ten bih ding ah ka pa nih I rak cawi ih a sung ih Mary le Jesuh zuk, zuk dangdang, sathaufar, thinglamtah pawl ka hmu ih mak hi ka rak ti tuk. Falam FBC Biakinn hi a tum zet mi a si ve ih ka pa hnen ah “himi biakinn maw kan biakinn a tha sawn tin ka rak sut”. Ka pa nih I let sal man hlan ah U Aving nih “R.C Biakinn pan teh a tha sawn” tin a rak el cih. Ka pa cu a rak hni men.

Biakinn kan vun liam zik te in thing thawn sak mi a mepian rawng (Apyayawng) in dot hnih a rak um. Cui inn hmai ah cu pangpar hmuan, pangpar phunkim an rak cing. Ka thlang lam ka zoh ih pangpar phun kim in a khat. A rak mawi zet, a background ah le vankau tlang, pangpar phunkim, thingkhung, Biakinn le Father pawl umnak inn thatha thawn mak hi ka rak ti tuk. Cumi thing inn pya ah cu kan thleng in keimah vek nauhak tampi an rak um. Sister nu a rak suak ih ka pa thawn an biak awk ih Sister nu nih I rak hruai tum. Ka pa ka rak thlah duh lo. Ka pa nih cu sister nu hnen ah I pek ih “zun ka thawh ta ding, malte rei le ka ra sal ding” I rak ti. Cutin sister nu nih tap phah in inn sungah I lut pi. A rei nawn hnu ah mi thar ti cu a um cia mi pawl nih le in rak zoh thluh, ka ningzak thawn ka rak tap sinsin. Zaw Min Htun nih cu “Na pa zun thawh cu a va rei ve” I rak ti bet ih sun hrek tiang lai cu ka tap ding a bang. Sun ah cu Biakinn hmai ah cikiling cikawlong (see-saw) kan to cu nuam ka rak ti zet. Cule nazi 12 kim khawnglawng tum ka rak dir bawm ve cu ka cing. Cumi hnu cu zaan lam kan tlung zik ih hla kan sak lai fang lawng ka cing. Cumi ni ah hla ka thiam lo nan netalam ah ka thei sal “Now this school is over, we are going home. Good bye .. Good bye … we are going home” timi hla kan rak sak ih sangka an ong in cu ka pa ka rak hmu ih ka lung awi zet. Mi dang rualpi pawl in “Na pa zun thawh cu a rei dan” in rak ti thotho.

Cunah lai ih R.C rak kaitu pawl hi kanmah ten tohkham (chair) kan nei cio, kan tohkam ah kan hmin an rak ngan cio. Tuni tiang cumi chair te cu a um lai, kum a rei vivo, keimah khal ka u pa vivo vekin, himi tohkham te khal a rak rop, tinbawsi ih ngan mi hmin te cu a rak piat. Himi kum ih ka kaipi mi, ka hnakin kum khat upa deuh pawl Zaw Min Htun (thizo), Thian Uk Thang (nung lai), Bawi Hum Thang, Bawi Lian Cung le midang dang pawl tla an rak kai. Sister te, lai tong in cu Sittae tin kan rak ko ih, an rak thin sau zetin in rak zirh mi ka ruat sal tikah ka lungawi zet. Tu hnu ah ka lawm hngai zet. Ka nu le pa in leitlun ih nun hi a rak harsa zia an rak thei, kan nauhak ten tuni ih 21st century ih challenges pawl pahtlang thei ding ah vision tumpi nei in, ziang hman kan thei hlan ihsin, in rak timtuah sak cia mi ka thei ngah tikah nu le pa duhdawtnak ka thei fiang deuhdeuh.

Falam RC Mugyo Tlawng (Thar)

Falam RC Mugyo Tlawng (Thar)

Ka Hmin

Ka Hmin

Kan TohKham

Kan Tohkham

 

Na ruahnak