U Ko Ni thihnak thawn pehpar aw in

Home » Thlirnak » U Ko Ni thihnak thawn pehpar aw in

By vcth on February 1, 2017.

NLD legal adviser U Ko Ni cu Janaury 29, zaanlam nazi 4:55 ah Yangon International Airport ah a tupa te cawi phah in taxi a hngak rero lai ah a dunglam ihsin a bop ah meithal in kap that a si.

U Ko Ni thattu cu Ko Kyi Lyin a si. Thawng kum tawkfang rak tlak dahtu a si. Cun Ko Kyi Lyin ih sim daan ah Maesot ih um U Myint Shwe timi in that a fial ih meithal tla a hnen in a ngah tiah theih a si.

U Ko Ni that tuarnak thawn pehpar aw in faing zetin kan hmu theimi le mangbangza thil pawl tla cu:

1. Mithattu in U Ko Ni ih schedule faingten a thei – Mithattu in U Ko Ni ziangtikah a tlung ding ti ni, caan, faingten a thei.

2. Mithattu in ziangruangah Airport ah a that? – Mithattu in U Ko Ni cu a inn ah siseh, mi sukso mal deuhnak lamzin ti vek ah tla a that thei ko nan ziangruangah mipi tamnak, risk a tam zetnak International Airport ah hna-ngam zetin a that, ti ruat ding a um.

3. U Ko Ni kap a tuar lai video clip le a kaptu misual an kaihnak video clip kan zoh tikah palik pawl hmu ding an um lo. Misual pa tla taxi driver pawl ih an kai hnu lawngah palik pawl an thleng.

4. Mithattu in U Ko Ni a bop ah a kap lai, meithal a tin lai zuk hi zo in a zuk si pei? CCTV ih ta le a si lo.

Karbak pahnihnak ah U Ko Ni hi ruangah that a tuar si pei? (A tanglam ih thu pawl cu thufiangfai siloin ruahnak, zumnak pawl a si)

1. U Ko Ni cu Muslim a si. U Ko Ni cu NLD cozah ih dun le daan lam thu ruahron pakhat a si. Buddhist extreme pawl in biaknak dangdang, Buddhist lo poh cu an hua ko nan, Islam (Muslim) an huat a luar ce. U Ko Ni that a tuarnak ah Muslim pakhat rampi upa pakhat a sinak zoh theilo, mitkem, ruangah a si thei. U Ko NI thihnak ah Buddhist ramduhthang pawl an riah a sia lo.

2. U Ko Ni cu 2008 danhrampi nasa zetin a dotu a si. U Ko Ni in “2008 daanhrampi cu ralkap pawl ih duh vekin tuahmi a si. 2008 daanhrampi tang ah Democracy timi a um thei lo. Democracy ram taktak kan si thei dingin cu Daanhrampi a thar kan tuah a tul,” tiah a ti. Himi thu ah U Ko Ni cu ralkap pawl nasa zetin a rak dotu NLD pawl hnakin hman a khoh sawn. 2008 daanhrampi a do tikah a domi hi ralkap pawl lawng silo ih ralkap ih hmanrua USDP pawl tla an tel cih. Curuangah U Ko Ni thihnak ih a dunglam ah 2008 daanhrampi a kai-hngettu ralkap pawl an tel men ding tiah zum a um.

3. Rampi buai ding a duhtu – sim zo vekin U Ko Ni cu Muslim a si. Myanmar ram sungah Muslim mi ahcun cozah hnatuan sangbik a si ding. U Ko Ni that a tuarnak in ramsungah biaknak lam lunghmu awk lonak a suak sinsin ding ti zum a um. Cuti ih biaknak lam siseh, ramkhel thu ah siseh, ramsungah remdaihnak um lo in buai celcel ih um a duhtu an rak um ve. Ramsungih buaknak pawl kan zoh tikah mimal sawn miphun maw, biaknak (minority) hrang ahcun beidongza a si nan, mitam sawn miphun, maw biaknak (majority) pawl hrang ahcun mi an silhkhah (influence) theinak caan ttha a rak si.

A tlun ih ka tarmi group, sinak, pathum hi mi dangdang siloin, mi pakhat sungah a um tla a si thei.

Na ruahnak