US Election le An Thukam Pawl Thlirnak

Home » Thlirnak » US Election le An Thukam Pawl Thlirnak

By vcth on September 9, 2012.

US Hrilawknak pi cu a rei hlan ah a thleng thlang ding (November). Democratic lam tla, Republican lam tla in mipi hnen ah thukam a phunphun an pek. An thukam thupibik pawl cu Hnaṭuan sersiam (Job Creation), Pursum leilawn dinsal (Economic Reform), American humhimnak, Fimthiamnak, harhdamnak le zathlang nun humhimnak (social security) pawl tla an si.

Democratic lam in President a cuhtu ding tu cu tu laifang President a ṭuan rero tu Barack Obama a si. Obama cu 2009 January ihsin US President a ṭuan ih 2008 an campaign lai ah Thleng Awnak (Change) ti thutlang pi keng in President a rak cuh. Tu 2012 ah Thleng Awnak si nawn lo in Hmainor (Forward) ti kutkaih thutlang a hmang ih mi zaran (middle class) pawl hmuitin in a campaign a tuah.

Obama President a ṭuan thok ah US pursum leilawnnak cu a tla sia ngaingai. Cui a besia mi dinhmun in President ṭuan thok ti cu a rak au vekin Thleng Awnak (Change) a ol lo. Thil tam pi, system tam pi cu a thleng nan a tak in mipi hmuh thei ding a ol hrih lo.

Cutiih thleng awnak ngaingai mipi nunnak ah hmu theih a silo ruangah mipi tampi cu an beidong ih Repbublican lam ah tha pe sehla a dik sawn pei maw tiih lung vai rero tu tla an um. Asinan Obama a rak ṭuan thok ah US Pursum dinhmun a tlak sia tuk ruangah kum 4 sungah cun tundin a theih lo a ti tu tla an um ve.

Obama cu thusim thiam zet, mi hip thei zet a sinak, a felfaimi (a fiangfaimi) thukam a peknak pawl in 2012 President a peh hrih ding ti zumnak a um. Cuhlei ah US President hlun Bill Clinton tla in a dunglam in a dinpi bet fawn.

Obama President a peh ahcun ramdang pawl thawn an pehtlai awnak tu vek thotho a si ding. Russia, Tuluk, Arab ram pawl, Middle East ram pawl le leitlun ram pawl thawn buainak a mal bik le rualrem zetin pehtlai aw thei an zuam ding.

Khatlam party (Republican) pawl mallai kan thlir hnik pei. 2012 President ding ih an hrilmi (Nominee) cu Mitt Romney a si. Romney cu  70th nak Massachusetts State ih ramuk (Governor) a rak si ih a pa George Romney tla Michigan Ramuk a rak si. Romney cu pursum pu (Businessman) a si.

Mipi tampi cun Romney in US ih a tlasia mi pursum leilawnnak, hnaṭuan neilo tammi thu buai pawl cu a ti ṭha thei ding an zum. Ziangah ti le amah hi Pursum Pu a si, pursum leilawnnak thawn pehpar aw in hmuhtonnak tampi nei tu tla a si, Harvard Punsang tlawng ihsin MBA (Master of Business Administration) ngah tu tla a si fawn. Obama ih tumtahmi cu ruahnak (theory) lawng a si, a tak (Practical) in a cang thei lo ding a ti tu tla an um.

2012 hril awnak ah Romney inn a neh a si ahcun a hmaisabik ah ramdang thawn an pehtlai awnak a thleng ding. A hleice in Russia, Tuluk le Arab ram pawl thawn an peitlai awnak a cet ding. Himi parah Obama cun Cold War thinlung an nei lai ruangah a ti. Nan Romney cun rual cu rual, ral cu ral ti deuh a si. Ramdang thawn pehtlai awnak ah dinhmun (Stand) kan neih ṭul tiah US secretary hlun a si mi Condoleezza Rice in an party ai awh in a sim. Curuangah an kutkaih thutlang ah “We Believe in America,” ti hmang in Campaign an tuah.

Hih US hrilawnak ih an thukam pawl zoh rero tikah fiang zet ih kan hmuh thei mi thil pawl a um, cu pawl cu US ih hnaṭuan neilo mipum an tam zia, US a ṭum suk vivo ih ramdang EU, Russia le China pawl an kai so vivo ti thu, US humhimnak (National Security) an ṭul zia ti pawl kan hmu thei.

“Vui ṭawl cu caw thau hnakin a tum sawn” an ti bang in US cu ziang lam khal lole Leitlun ah lu bik in cu a tlan lai ko.

By Francis Cung Bik

Republican Lam Pawl

[N3u1Y0vhtYU]

[4g6PpIW3hPg]

[pZipUINVXIc]

Democratic Lam Pawl

[kKQV9bEcV28]

[i5knEXDsrL4]

[9sbm83xoV8g]

Na ruahnak

2 Responses to US Election le An Thukam Pawl Thlirnak

  1. Salai Mazawn   September 9, 2012 at 8:43 am

    Vcth.net tulawngah ka siar ih leng a nuam in thuthang tha na sa. Zuam sinsin uh.
    Lungawi.

  2. Ma Mang   September 11, 2012 at 3:56 am

    Bik,

    Ka lungawi tuk, USA election hi ka sikwinsaa zet nan mirang in famkim ten ka thei thluh theu lo ih zoha rak ngan tu um ding ti’n kan thlir ringring
    Siar nuam zawng le theih tha ngai ngai na rak ngan ih ka lungawu nasa. Neta tla pehzom thei vivo hram aw.

    Kei cu Mitt Romney lam ka ttang deuh. Ngah hram seh tin thla ka cam theu.

    Thankssssssssss

    Ma Mang ( Van member )