Van Gogh Parih Mit Pahnih

Home » Cahram » Van Gogh Parih Mit Pahnih

By vcth on July 11, 2013.

Francis Cung Bik

2003, December ah Mg Htun Thu ih lehmi cabu pakhat ka lei. Cabu thulu cu Yamat Mi ti a siih Vincent Van Gogh ih thu a si. Cabu thar thawn cu inn ah lungawi ten ka tlung. Ka cabuai parah ka cabu cu ka ret, zaan ah siar ka tum. Ka pa zung ihsin a tlung, ka cabu cu a hmu. Ka pa cu casiar peihtu pakhat a si vekin cui cabu thar te cu a lakih a siar. Ka pa a siar lo caanah kei ka siar. Cutin kan hleh ka aw.

Van Gogh thu cu ka duh nasa. Milian innsungsang ih suak asinan lennak, hminthannak a hawl lo thu, Pastor a ṭuan laiah farah zonzai a kawhhran mipi pawl thawn pumkhat in a tuarpit zia, a duhdawtmi lungduhte hrangah zianghman a nei lo nan a lungduhte ih a mawi zet ih a hmuhmi a hna a fala nu laksawng ih a pek thu, zuk a suai mi pawl hminthan duh ruangah siloin zuksuai cu a nunnak ih ṭhenkhat a si zia, a zuklem pawl cu a thinlung hiarhalnak a hliomi mei alh ih irh suak mi a si zia, a zuksuai mi pawl cu a nunnak ih a tuarnak (feeling) pawl tarlangnak inn a si zia cu pawl cu ka uar nasa. Van Gogh cu ka uar tukih ka pi ih hmin a pek cia mi kan uico MB kha keimah ten Van Gogh tin ka thleng.

Zuksuai peih ka silo, a thiam tla ka thiam lo. Mi zuksuai cu a zoh ka peih ih tawk deuh lai. Ziangruangah Van Gogh hi ka uar nasa ti keimah ten thu ka sut aw. A zuklem maw ka duh, maw a nun maw, a pahnih ten?

Van Gogh Parih Mit pahnih

Van Gogh ih thuanthu thei hlah sehla, zuksuia a peih lo le thaim lo tu ka si vekin a zuksuai mi pawl ka duh ciamco ding ka zum lem lo. A nunnak ka uar ruangah a nunnak ih a hliomi a hiarhalnak pawl ih a irh suah mi a kut neh pawl ka uar.

Zarhkhat hrawng a rei hnuah ka pa thawn thunuam rel tlangnak caan ka ngah. Ram thuhla, leitlun thu, Sep 11 ih thil cang mi thu pawl, thuhla phunphun kan rel khawm. Van Gogh ka uar zia thu tla ka sim. Ka pa tla in lungthiang ten Van Gogh parih a hmuh daan in sim ve. Ka pa in, ‘Van Gogh cu ka uar lo nasa, mi aa a si.’ Mah nunnak hrang ziang ka tuah ding ti a ruat thei lo tu, mah le mah hman ṭhiṭha ih a cawm aw thei lo tu pacang pakhat a si zia, fala pakhat hrangah mah hna pek ti cu thinlung lam mifamkim lo (psychology problem) a si zia pawl cu in sim ve. A hmuhdaan in cu a dik ve, zianghman el ding ka nei lo.

Ka pa hrang ih zero cu kei ka hrangah hero a si. Ka pa ih a hmuhdaan a sual lo ti ka lung kim pi ko cuvekin ka hmuhdaan tla a dik ti ka lung kim pi aw ve. Zuksuai cu ka peih lo nan awnmawi cu a duh zettu pa pakhat ka si. Van Gogh a naupa tluk in cu ka theithiam pi thei lo men ding asinan thinlung a Hliomi Hiarhalnak ih man, ziang a si ti cu a tam le mal in ka theithiam pi ve.

A Hliomi Hiarhalnak cabu cu kan innsungsang ah mit pa hnih in kan siar ih hmuhdaan pahnih a suak. Mit pali in siar sehla hmuhdaan pali a suak men ding. Ka pa ih hmuhdaan in ka mit in mal ter lo. Ka pa in Van Gogh a uar lo ruangah, uar lo in ka um cuang lo. Cuvekin leitlun ah mit tampi, mit pawl in a phunphun-in in hmu ko ding asinan ka hmuhdaan, ka leitlun pi thawn ka hmailam ah a fung le rang in ke ka kar rero ko ding. A dik ka ti mi tla mi pawl-in a dik in ti pi thluh lo ding. A ṭha an ti mi tla ka hrangah an ṭha thluh lo men ding. Hih A Hliomi Hiarhalnak parih Mit Pahnih in leitlunpi leh thil um tu daan pawl ka lung in fiang ter.

Na ruahnak