VCTH le CLD Sungtuan Salai PP Suhtonnak

Home » Interview » VCTH le CLD Sungtuan Salai PP Suhtonnak

By vcth on August 20, 2015.

Chin League for Democracy party sungtuan le Falam peng pyine 1 in MP cuhtu ding Salai Vum Za Piang aka Salai PP cu VCTH in suthtonak kan nei. Suhtonnak pawl tla cu a tanglam vekin an si.

Salai Vum Za Piang

Hmin: Salai Vum Za Piang (Salai PP)
Party: Chin League for Democracy (CLD)
Suahsemnak Khua: Lungbum
Hnam: Tapong
Kum: 51

VCTH: Na fim zirnak thuhla mallai? (Education background)

Salai PP: Ka fimzirnak pawl cu phunhra cu 1985 Tedim BEHS; 1995 ah BA (Psy); 2000 ah BRE; 2012 ah MDevS; 2013 ah PGDPM le DBL; 2015 ah M.PM le Tindan certificates 20 ka ngah.

VCTH: Chin Party tampi a um zo nan ziangruangah CLD nan din? CLD ih party dang hnakih a danglamnak ziang a si?

Salai PP: CLD kan dinnak san bik cu a laihawl, a cak zetmi Chin party pakhat a um a ṭul ti, kan ruah ruangah a si.

CLD party policy cabu, Akhaanpi (3), Tumtahmi sungih (d) (e) le (g) hi a hleicetnak bik a si. (d) Chin ramkulh leeng ih um, Chinmi zaten Daan vekin canvo le covo kim ten ngah ding. (e) Chin miphun zate huapin lungrual ten ṭuan tlang ding. (g) Ramhrin miphun mal pawl thawn Chinmi pawlih hmasuan covo sinak pawl him dingin humhualh ding.

VCTH: Mitampi in Chinmi Ting 5 kuam (Chin ramih um) kan siih tualto party 10 lenglo le Central party 3 lai a um, kan mipum ruatin party a tamtuk an ti, ziangtin na ruat? Tuhnu lam ah party a karh vivo hrih thei, Paty thar a ṭul in na ruat maw?

Salai PP: Tualṭo party ah Chin zate huap party pathum kan um. CLD kan dinnak san ka sim zo. A dang party pawl cu Local lole hrinhnam hrambun party an si. Asho, Khumi, M’ru tvp… party hi Chin ramkulh sungah an um lo. Chin ramkulh sung ih ummi pawl khal ṭul an ti ruangih dinmi a si thotho. Cu ti ih an din tik lawngah anmah le canvo le covo pawl an humhim thei ve ding. A ṭul hrimhrim ko. Party ah kan khat lo nan Chin hrang ahcun kan ṭuan tlang thei ṭhehmi hi mangbangza a si. Party cu a karh vivo thei vekin, an komaw vivo thei ve. Hmai lam ahcun kan komaw vivo lam sawn a si ding. Party thar a karh ahcun a ṭul ruangah a si, ti in cohlan sakawk ding sawn a si.

VCTH: Mitampi tualṭo party maw, Central party a thupi sawn ti an el aw ṭheu. Nang teh na hmuhdaan ziangtin si?

Salai PP: Tualṭo party a ṭul, ti ka hmuhfel ruangah lamzin thar saat in harsa cingten CLD kan dinnak a si. Tthimnak ah Biaknak tthawn ding Daan upadi nemhnet lolli bang sehla… central party ah na um ahcun duh lo khal len Amen ti a ttul. Asinan tualṭo party cun duhlonak kan phorhlang thei ringring ih, kan miphun kan kilhim thei taktak ding.

VCTH: CLD party ihsin MP hmun ziat hrawng cuh nan tum (Chin ramkulh, Kalay le Tamu pengkulh telin)?

Salai PP: CLD in MP 30 lai in Tonzang le Paletwa siar lo Chin ramkulh ah le, Kalay, Tamu peng, Rakhaing ramkulh pawlah kan zuam ve ding.

VCTH: CLD in Falam pengah MP hmun 1 (Pyine No.1) lawngah nan zuam tum ti kan thei, ziang ruangah MP hmun dang pawl ah teh nan zuam lo?

Salai PP: CLD in Falam peng Pyine No. 1 lawngah keimah in ka zuam ding. Chin party pahra tonkhawm lungkimnak vekin Chin party sungah a cang thei tawkin hmun kian aw ding, ti a si. Kan practise mai ko, hmaisa bik ah.

VCTH: MP pakhat ih covo le tuanvo hi ziang a si?

Salai PP: MP pakhat ih ttuanvo cu 2008 Daanhrampi rem, Daante pawl a thar tuah, a hlun rem, hman theih lomi pawl hlon TUAH, REM HLON hi a si bik. Cun, ṭhansonak hrangah Policy tuah a si ih, Vuanci department pawl in ṭuanmi pawl kha check and balance (kilhliah-khaikhinawknak) tuah a theih. Tthansonak tuahtu an si lo ih, tuah dingin policy ngaihtuahtu an si sawn. Covo cu an pekmi lahkha le ṭanpinak pawl lawng si ko.

VCTH: Falam peng Pyine Hluttaw MP ah na zuam tum ti kan thei, ziangruangah MP pakhat si na duh?

Salai PP: MP si ka duhnak cu …. ka zirmi Master of Development Studies le Master of Professional Studies in Political Management hmangin kan ram ṭhansohnak hna ka ṭuan duh ve ruangah a si. Hih hrangah kum ruk sung zonzai zetin fimthiamnak zirin ka tiimlam ve.

VCTH: Falam Peng Pyine 1 ih MP a zuamtu ding Candidate dang pawl hnakin  na danglam hleicenak hi ziang a si pei?

Salai PP: Pu Sui Hmung, Pu Ral Hnin le Pi Sui Thluai pawl hi kum ah siseh, fimnak ah siseh kan u le kan pa, kan nu an si. A si nan santhar thiamnak ah le hruaitu sinak (leadership) ahcun kan hleih ko hmang. Cun, kum khalah ka duhtawk laifang a si. A thupibik cu zirnak lam hi a si. Development le politics ah master ka ṭheh.

VCTH: Na tum bangin Falam peng Pyine Hluttaw MP si awla ziang pawl hmaisabik ah na tuah ding?

Salai PP: Daanhrampi sung ih Pyine hrang ṭuanvo pekmi hi 2010 lai ahcun malte lawng a si. Tu ahcun an rem ih tam nawn in ṭuanvo zem a si thlang. Hi pawl hi kan ram hrangah a ṭul daan ih zirin hman thiam a thupi ngaingai. Chin ramkulh sungah kan ṭulmi zoh tikah a tam sawn cu a bang aw deuh thaw ko. Rampi in ṭuan hmaisa ding thulu pariat an tuah. Electric meisa, in ding tidai (clean drinking water), tlaitluan lothlawh (sustainable agriculture), hnatuan (Jobs) le cetzung lam ṭhansonak (Industries), sumdawnnak (Trade) le sumhram ṭohnak (Investment), sumpai lam thansonak (Financial development), Tluangtlawnnak (Tourism) ti pawl an si. Hi pawl hi Chin ramah kan ṭul ṭheh. Bangraan ten ṭuankim ding sawn a si. A hmaisa bik ti a um lo.

VCTH: UNDP ih cazin laknak ah Chin ramkulh hi Kawlram lakih farah bik a si, a hleice in khawte lam pawl ah kan taksa ih ṭulsammi calorie hman khopkham in kan silhkhah thei lo. Hi farahnak thu hi Hluttaw sungah ziangtin na nor ding?

Salai PP: Chin ramkulh hi a farah bik kan si ko. Hluttaw ah tongpa nor ih nor a theih lo, hnatuan daan kongzawng procedure vek ten feh a tul. Cumi hi thu khat a si. Kanmah in teh plan ttha zet kan nei maw, ti hi a thupi sawn lai. Master plan nei lo ih tlun lam ah tongpa nor ding cu …. a si thiam lo ding. Cuihhlei ah Rampi in Strategic Framework for Rural Development ttha ten tuahfel zomi a si ih, Chin ramkulh hrang khalah zohthim ding ttha zet model a si. Tuah ding daan cu Political Economy le Public Policy zawngin tuahdaan tampi a um ko.

VCTH: Kum tinten fur caan ah leimin, zinmin harsatnak kan tong ringring. A hleice in tu kum hi kum dang hnakin ruah a tam ce ih hmun tampi ah harsatnak an tong. Hi leimin, zinmin harsatnak in ziangtin kan luat thei pei?

Salai PP: Pianphung ih siatsuahnak ruangah harsatnak tilian leimin pawl hi milai thuneihnak ruangih cangmi an si lo, a leeng lole tlun lam thu a si. External factor kan ti, hrial theih lo mi an si. Asinan cang lo ding in tuah theimi malte a um, cang bang sehla ziangtin kan ti ding, ti tiinlamnak neih a theih. A cang hnu khal ah cakkhai bomnak Emergency Respones, le tuanrelnak tuah a theih. A thupi bik cu tundinsalnak Recovery Plan hi a si ih, caan saupi tuah le rem sal a ttul. A cang hnuhnu cun pehzulh hnatuan Process in tuah a ttul ih luat ding ti cu a har zet. Pyine Acozah ah ttuanvo nei ningla cu hih pawl hrangah Disaster prevention, Management le Resolution Plan ttha theibik in tuah ka zuan ding.

VCTH: Mipi le MP lakah gap a um ṭheu, hi gap um lo dingin ziang a thupi in na ruat?

Salai PP: Mipi le MP lakah, kaaknak lole hlatawknak Gap a um cu a fiang. A kaak a kau le a bi lawng a danglam ding. A um ringring ko ding. Cucu MP pawlih pehtlaihnak lam Communication Skill kan tlaksam ruangah a si ko. Hih skill hi Leadership Skill sungah a thupi zetmi thulu pakhat a si. Kaaknak um lo dingin cu Ramkhel lam Political Training zirnak neih tengteng mi in MP ttuan a ttul. Zir lopi in Naingnganzi kan ttuan sung cu bahlahnak tampi kan tong hrimhrim ko ding.

VCTH: Tikcu caan pekin kan thusutnak in sangmi parah tampi lungawinak kan nei.

Salai PP: Ka lungawi ve. 2015 Rampi hrilawknak ah kan Falam hrangah Pathian in Palai ṭha in pe ko seh.

Na ruahnak