VCTH le Mai Zirte suhtonnak

Home » Interview » VCTH le Mai Zirte suhtonnak

By vcth on October 16, 2017.

Falam Khawsung ih Phunsang tlawng hrang timlamnak, Mirang ca zirnak le Zatlang riannak lam ih tlawng pakhat a simi Chin Institute of Social Science tlawng in kan ram hrangah rinsan tlak mino tampi a hriang suak zo. CISS tlawng ttheh hnu in ramdang ih tlawng a peh bettu pawl an um rero vekin ramdang tlawng kai dingih a timtuah rerotu mino pawl tla an um. Cumi pawl lak ihsin VCTH in ramdang tlawng kai ding ih a timtuah rerotu Mai Zirte suhtonnak kan rak nei.

VCTH: Na thuhla tawi in sim thei pei maw?

Ka hmin cu Mai Zir Tir Thang siih Falam ah ka suak. Phun hrek in phun hra tiang No. 2, Basic Education High School, Falam ah ka kai. Phun kua tthal tlawngpit sung, CISS a hmaisabik an phuan thok kum in night tuition class ka kai ih phun hra ka ttheh ve tein CISS day class ka kai peh.

VCTH: Ziangtin CISS tlawng na thei thok ih ziangruangah CISS na kai?

Phun kua ka kai lai ah CISS phuan thok asi ding thu le night tuition kai thei nak ding thu CISS program director Gavin Wisdom nih kan tlawng (kan khaan) ah ra in theihternak a neiih cunah in ka thei thok. A hmaisabik kai ding ih khua ka rak khaangnak cu, CISS cu a hmaisabik mirang tlawng, ahleice in mirang pawl rori ih zirh ding mi a si tikah Laimi pawl hrang ih ngah har zet mi chance a siih mi rang tong tong thei ding in le kan senior; first le second generations pawl ih Falam hrang an cangvai daan pawl ka hmu hnu in CISS kai ding in thu ka tthen cet.

VCTH: CISS tlawng na kai tikah na ruat vek a si maw? Na rak ruahsanmi pawl a lopek thei maw?

CISS tlawng ka kai tikah ka ruat vek a si lo. Ka ruahnak ah cun mirang tong (speaking) hrawng lawng in zirh dingah ka rak ruat. CISS ah cun speaking lawng siloin mah le mah rinsan aw ih ram hrang ah hruaitu ttha pakhat si thei dingin a phunphun in zirnak kan nei. Cu lawng hman silo in Falam khua leng- a dang khua dang dang- kan thleng dah lonak hmun pawl ah tla in feh pi. Ka ruahsanmi pawl leeng ah ka ruatbaan lo mi tiangin in pek thei. Cumicu tuih tlawng ka kai reronak Pre- Collegiate Program lut thei ding tiang thiamnak in pek ih lam zin in ong sak.

VCTH: CISS tlawng na kai lai ih na duhbikmi pawl le har na tibik mi pawl, na hngilh theilo mi thil pawl in sim thei pei maw?

CISS tlawng ka kai lai ih ka duhbikmi cu Saya le tlawngta karlak ih peh tlaih awk daan asi. CISS ih ka tong mi Saya pawl cu Saya an sinak upat an tlak zet zet vekin u nau, sungkhat, rualpi vekin tla rinsan an tlak ngaingai. Saya ka si ti hngalnak thinlung nei lo in tlawngta pawl thawn lungrual zetin ke kan kar tlang hai.

A har ka tibik mi cu CISS tlawng cu a hlan ih kan rak kai mi acozah tlawng thawn bang aw lo, a dang lam; kan zir mi ca, zir daan, ttong hmang mi pawl a dang tikah ka kai thok ah cu a har ka ti em. Computer (laptop) cu tlawngta pa hnih lo le pa thum kom ah pakhat lawng kan hmang thei ruangah assignment tuah tikah mah duhduh, man cancan ah kan tuah thei lo mi a har ka ti.

CISS tlawng kai lai ih kan tuah mi, kan zir mi pawl a zaten ka hngilh thei lo. Cumi pawl lak sung ih pakhat a simi mi cu Falam khua kiang kap ih um mi khua pawl ah feh in Land Rights thusimnak le khua ih an ttul sam mi pawl sutnak project asi. Rinsan tlak khua-nu khua-pa pawl hmai ih thusimnak nei cu keimah hrangah a hmaisabiknak a si bang tukin le kan Falam khua kiangkap ih um tu khua mi pawl ziang vek harsatnak an tong timi le an mah ih rinsannak mit hmai te thawn kan mah hnen ah an tuul sam mi pawl in sim lai can te cu ka hngilh thei hrimhrim lo.

VCTH: Tulaifang ramdang ah tlawng kai dingin na timtuah rero tiah kan thei, PCP ah nan cazir dan le nan zuam dan, interview nan tuah thok ihsin thuhla cipciar deuh in in ruah thei pei maw?

PCP ah cun kawlram sung ih an hmang dah lo mi zir dan; discussion based in kan zir- thai zing ih zir ding mi ca siar ding assignment in pek cia ih class sung ah kan siar mi sung ta kan mah ih ruat daan, hmuh daan pawl relkhawm in kan zir tlang. Yangon khua sung, a kiang kap, Bagan tivek, pawl ah field trip thla khat ah vei hnih kan feh. Cu lawng siloin ramdang tlawng, a hleice in US tlawng lutnak hrang ih a ttul mi SAT le TOEFl hrang ah tla in zuam pi, zarh khat sungih tlawng pit can (weekend) ah Rangoon khua sung ah community work; volunteer kan tuan.

PCP tlawng ka apply lai ah ka nu te ih siannak ngah lo in ka rak phi. Innsungsang sungah lungkim aw lonak tam pi ka rak pah tlang. Pathian hnen ah thlacamnak, Bible siarnak thawng in le CISS ih ka saya pawl in ttan pinak thawng in ka neh suak. PCP entrance test kan phi laiah ziang hman thei lo rori in kan phi ih Pathian khai sangnak thawng in rinlopin writing test a ongtu lakah ka tel ve ih CISS in October thla ih Yangon trip kan feh phah ah minung pathum PCP ah Interview kan phi. Culai ah kan innsungsang pawl ih in duh sak mi Nursing Training School tla ka apply. October thla sung ah a pahnih ih result an suak tlang ih ka nu te nih cun nurse sawn kai dingin in timlam sak. Nurse kai ding in cu ka sunmang ah hman ka rak man dah mi a si lo tikahcun PCP sawn kai ding in ka nu te ih in hril sak mi cu ka rak el. Keimah lawng ih simnak lawng in an lung ka tong ter thei lo ruang ah CISS ih Saya pawl an zaten kan inn ah ra in ka nu hnen ah tthaten le ka nu lung fiang vurvo dingin in sim sak. Cutin ka nu ih siannak ka ngah sal.

VCTH: CISS ih na rak zirmi pawl hi hmailam na tlawng kainak hrangah a lo tthathnem pi maw? A tui nan lak duhmi course pawl hi CISS ih nan zirmi thawn a peh tlaihnak a um maw?

CISS ih ka rak zirmi pawl in hmailam ka tlawng kainak hrang ah tampi tthathnem nak in pek. PCP cu liberal art tlawng asi bang tuk in CISS ih kan zir dah mi pawl tam pi an tel. College ah Environmental Science, Sociology le Anthropology pawl ka lak tum ih an zaten CISS ah ka rak zir tep dah mi lawnglawng an si.

VCTH: Hmailam ih na tumtahmi in sim thei pei maw?

Kan hmai lam ih thilcang ding mi cu ka sim thei lo na in ziangtin cang sehla tiih tumtahnak cu kan nei cio. Kei tla hmailam can ah ramdang ah College kai ttheh in Kan Ram hrang ah a cang thei bik in ka zir ngah mi pawl hmang in thleng awknak pakhat tal hmuh dingin ka zuam. Kawlram zate pi lo le hman ah kan Chin ram hrang tal ah rinsan tlak hruaitu ttha si thei dingin tumtahnak ka nei. Ahleice in kan Chin ram ih mino pawl ih hmai lam kekarnak ding lamzin on a si cia mi a mal tuk ruangah Chin mipi hrang ih lam zin a on tu si thei ding in tumtahnak tum pi ka nei.

VCTH: CISS tlawng a kai duhtu mino pakhat hnen ah ziang ruahak pek na duh?

Na tumtah, na tuah duhmi par ah thin lung tak le rinum takin Pathian rinsan nak thawn tuah aw.

CISS ziang ruang ah na kai duh ticu nang mahten na nei cia ding asinaan, na ruahnak le na saduhthah mi hrangah lamzin a lo on saktu asi ding tin cu ka ti ngam. Na kai hlan ih na thu ruat daan, ram na duhdawt dan pawl le na kai hnu ih thil na hmu dan, na ruahnak pawl an thleng aw ih an tthang zia cu nangmah le nangmah na thei aw vurvo ding. Na kai ttheh hnu khal ah a hmin meen lawng kaitu silo in na tuah, na tuan thei tawk in ram hrang ah na thiam nak hmang in le rinsan tlak zet in Kan lai ram hrang ah hna a tuan tu si thei ding in zuam aw. Mi in a cang thei lo ding an lo ti mi kha cang ko in an hmai ah hmuh in an hmuh ban lo mi na sung ih a luang mi ti-khur thawn ti a tulhtu si thei dingin ttang aw. Tthim te hmang in na in ding mi ti-khur a lai rero tu silo ding in zuamnak thu ngai thlak in nei aw.

VCTH: Caan pek in kan thusuhnak pawl in sangtu Mai zirte parah tampi lungawinak kan nei. Hi interview a siartu pakhat ciar tla thazang kan ngah ding tiah zumnak kan nei.

 

Na ruahnak