Wales Ramih Tlang Sangbik Kan Kainak

Home » Hmun Le Hma » Khual Tlawnnak » Wales Ramih Tlang Sangbik Kan Kainak

By vcth on October 10, 2013.

Salai Van Cung Lian/ Salai Cung Luai

Wales ram hi United Kingdom (UK) sung um ram pakhat a si. England, Scotland le Wales ram thum kom hi Great Britain tiah kawh a si. Himi ram thum sungih ummi pawl hi British an ti. England ram sung lawng ih um pawl hi English an ti. Cun, England, Scotland, Wales le Northen Ireland ram li kom hi United Kingdom (UK) tiah kawh a si ih London in a uk thluh hai. Wales ram hi mipum 3 millions luan hrawng lawng umnak ram fate asinan leitlun mi hminthang le milar tampi suah kehnak ram tla a si. Tulai leilung tlun ah bawhlung lekthiam tu pawl lak ah mankhung bik Gareth Bale, Manchester United ih lek rero tu Ryan Giggs le Arsenal a uar zet tu pawl ih Messi an ti mi Aron Ramsey pawl suahkeh nak ram a si.

UK ram hi tikulh pakhat asinan amah tawkten tlang sang  tete a rak um ve zet. Scotland le England ram ih tlang sangbik pawl a si mi Bennevis (4,409ft) tlang le Scafelpike (3,238ft) tlang hi kan dung kum ah khan ka rak kai dah zo. UK ih tlang sangbik pawl an si nan Falam hnakin a niam lai. Laimi hi mirang pawl hnak in sang sawn ah kan um. Wales ram ih tlang sangbik tlang belte ka kai dah hrih lo. Zingkhat cu Wales ram khuapi bik Cardiff ih um ka rualpi thabik a si mi Salai Cung luai (A mah lawng laimi si Wales ram ah) thawn kan biak awk ih Snowdon tlang kai ding ka sawm tikah a nih khal a rak phur zet. Cuti, Cardiff khua ihsin Snowdon tlang lam ahcun kan rak pok.

Snowdon tlang hi Wales ram sungah tlang sangbik pakhat a si. Himi tlang hi Wales ram nisuahnak lam ihsin saklam ah a um ih sea level (3,560 ft) a sang. Tlang sangbik kan ti nan kan Falam khua hnak in a hei niam thotho kha. Kan nih tlangpar ih um ṭhang pawl hrang ah tla cu ziang hman si lo vek khi si. Falam khua kan inn kiang U Maung Hla ih zingpit khua vang hlan Vankau tlang R.C biakinn ih a thlacam nak cen fang hrawng si ko ding tiah kan capo awk rero. Cardiff khua ihsin Friday sun 12:00pm hrawng in Snowdon tlanglam pan in phurzet in  kan pok ih Fairborne timi khuate ah zanlam nazi 4pm hnu lawngah kan thleng. Cumi khua te ahcun zan khat kan riak cih. Nazi 4 sunglai motor mawng a si ko nan lamzin tluan ah kan Kawlram 1950-60s hrawng ih ramkhel (Politic) thu, Urdu ṭongfang pawl kan Falam ṭong ah kan rawi dan, cangan thiam le mifim Thei Phay Myint, Pe Maung Tin  tivek cun Hla Oo (blogger) timi pa ih ngan mi Kawlram ziangruang ah  a ṭhangso ding tlukin a ṭhangso lo  timi a ngan mi par ih kan hmuh dan tete kan lamtluan ahcun kan rel phah vingvo ih nazi pali a rak cem mei. Kan thlengnak Fairbourne hi tipi kiang um khua fate pakhat asinan amah tawk te’n a mawi zet. Mi thinlung tla a dai ter zet mi khua te a si. Cuih kan thlen zan cu khua kiangkap tawivak phah in zanriah ah Mirang pawl duh zat mi Fish and Chips (nga le Aaalu koi) kan ei. A thaizing zingpit ten English beakfast thaw zetin kan riahbuk thlennak ah kan ei ṭheh hnu ah Tlang kan kainak ding hmun Snowdon (Snowdonia National Park) lam ah kan pan.

Motor thawn Nazi 1:30hr zik hrawng kan feh hnu ah tlang tang ih khuate ‘Rhud-ddu’ timi khua kan thleng. Tlangkai tu pawl hrang ih an tuah mi car parking cu a rak khat zik te. Cuih hmun kan thleng ahcun mi tampi tlang kai dingin an timtuah rero laifang si. Mi hrekkhat cu mountain-bike thawn kai an tum ih kan ti celcel. Kan nih khal tlang kai dingin timtuahnak kan nei ve. Vansiat maw kan ti ding vanthat sawn, Suncaw keng kan hngilh ngel cel, cubet ah map le kan keng lo ih khawi lam ihsin thawk ding ti khal kan thei lo bet lai. Vanthatnak ah Kawlram ih ka rak phur mi BPI Datsaa le Tisung Datsaa thuk khat veve te ka rak pai ngelcel. Cun kiangkap ah map kan hawl ih khawi lam hi North sipei ti ah kan zumnak kan sim veve. Mifim pa thum bang in arsi silo in, Ni kan zoh ih North cu kan hawl ngah ve ko. Cun, kan feh tumnak lamah mi hrekkhat khal an pan ve tikah, kan hman ko hih tiah kan hna-ngam zet.

Cutin Tlanghram ihsin a sangnak lam ah 10:18am in kan vun kai thok cuahco. Himi tlang hi hminthang zetmi tourist pawl fehnak le kainak  a si ih lamzin thaten tuah mi a si. Tidai kan keng mi sungah kan suncaw neih sun Datsaa cu kan cawk ih kan rilrawng lo ding datsaa kan nei ko tiah kan hna ngam tak. A thok lam cu a ol pam, hmunso a tamtuk lo ih thurelnak caan kan nei lala. Tlangkai kan fehhlan te ah Salai Ram Ling Hmung ih nganmi “Tufang ih Laimi pawl kan tulsam mi” timi cahram ka rak siar. Cumi sung ah laimi pawl ziangah kan thangso lo, ziangtin kan thangso thei ding timi pawl tha zetin a sim. A sim mi pakhat cu kan umnak leiram (geography) ruangah khal thansonak lam ah a har timi point te a um. Laitlang thu tete pawl ruahawk phah in a sangnak lam kan kai vivo. Kan nih cu holiday le diriamnak ding men ah hetchet tin tlang kan kai. Kan lairam, a hleice in khawte lam pawl cu kan nunnak ding hrang ah thingphur, hanghnah hangti, bel, sa phur in hmunso ah kan vakin kan pum kan cawm. Pitar/ Putar tete bawm khat in thing phur pawl kan mithlam ah a cuang ih laimi kan nun dan hardan pawl kan rel ih kan thinnuam lo phah. A sangnak deuh kan thleng in kanmah vek tlang kai mi hmaisa deuh ih rak pok ciami pawl tampi kan lan, kan tong. A sang kan thleng deuh deuh, view a mawi sinsin, hring dildel tlang, tuu, tili, khuate pawl kan hmu phah ih Pathain thil tuah mawi dan pawl kan cuan.

Kan kai vivo ih lamzin ah mi tampi kan luan phah in kan hnuk set aw. Tlangkai a nuamnak pakhat cu a kai mi pohpoh hi kan hmuitin mi a bang aw thluh (a sangbik nak hmun thleng ding), cun kan duhnak a bang awk tikah pakhat le pakhat biak awk a ol zet. Kan kai vivo ih lamzin hrek peng 3 hrawng kan thleng ah cu mero a pit zet. Khuate in kan kai pek te cu nikhua tha, ni a sa zet nan a tlun deuh kan thleng ah cu miro pit thepthep khi si. A sang deuhdeuh in thli khal a tam deuhdeuh, a fehnak lamzin khal a fate deuhdeuh in kan ke palnak ralring ten kan kai vivo. Cutin 12:50pm ah a sangbik nak hmun kan thleng. Mangbang zetin cui hmun ah cu inn tha zet sak mi a um ih a sung ah ei ding phunphun an zuar. Minung an tam dan cu laizo pawl awkam ka hlang si le “thah cawk lo” tluk khi si. Cui hmun cu tlang leng in khal kai theih a rak si ih tlangleng station khal a um cih. Tlangleng station a um ti ka rak thei dah nan hi tawk hmun a rak si ding ka rak zum lo. Ei ding kan lei theh hnu ah a sangbik nak hmun te va zoh ding ah kan va dan si. Reituk cu kan hngak lo. Cutin Wales ram ih a sangbik nak hmun cu kan ke tang ah kan ret thei. A sangbik nak hmuh te ah kan pahnih in ka zuk awk ih cumi fang ah cu Wales ram ah a sangbik kan si (Dr. Pa Sang siar lo). Cui hmun in cu mero pit theh ih ziang view khal hmuh theih a si lo. Kan hmai kar hra fang tluk khi hmuh theih a si. 1:08pm ihsin kan suk sal ih Carpark ah cu 2:18pm ah kan thleng. Kan hnipuan kan thelng ih inn tlung lam kan tim tuah.

Tlangkai kan bang pam, U Maung Hla ih R.C biak inn ih thlacam nak fang hrawng cu a rak si lo. A suk le so ah a zaten peng 7.5 hrek a si. A suk lam zin hrek hawng ihsin ka ke a na thok. Kan bang zet thawn Cardiff lam pan in nazi pa 5 sung lai motor mawng bet ding cu aw ka ti ih ka thinphang phah a si nan lamzin ah thu tin kim kan rel ih Cardiff ziang tin kan thleng hman theih man a si lo. Lamzin ah lairam ah ziang tin Presbyterian missionary, R.C le Baptist missionary pawl an thleng, Carson siangbawinu le Dr.Cope an buai dan thu pawl kan rel. Kan sutawk  veve  mi thu pakhat cu kan Falam in missionary a nei lonak thu a si. Hakha le Tedim ah cu mission centre a um nan Falam ah a um ti ka thei dah lo nan ziangtin mitam sawn zumtu ah kan rak cang thluh timi hi kan ruat veve. Cun Tlaisun a tam sawn hi ziang ruang ah R.C an si? Falam ah Taluk pawl ziangtin an rak thleng? Kan Falam tong sungah Urdu in in rak influence dan ti vek pawl khal kan ruah awk. Hlan lai kan pi le pu san ih khuavang an rak biak dan le cui khuavang pawl thil an ti thei ve dan pawl, hlan lai ih Khuasia an rak nei dan pawl kan rel ih kan nuam zet. Cun Cikei timi tla hi legend ding cu a bang nan ziangtin thuanthu kan nei thok si pei ti vek khal kan ruat. Mirang ram ah khal Werewolf thuanthu pawl kan pi le pu pawl vekin an rak nei ve ih a rak um ngaingai si pei maw ti khal kan ruat. Kan tong a bang deuh le Zante ih Thu Kham Thar album kan ngai ih kan nuam rau. Cutin rei lo te ah nazi pa 5 a rak kim mei ih inn ah kan thleng sal. Tucu UK ram sung ah tlang kai ding ka nei nawn lo. Kai ding a um sun hmuahhmuah cu ka kai theh zo.

[nggallery id=5]

Na ruahnak

2 Responses to Wales Ramih Tlang Sangbik Kan Kainak

  1. Van Khaw Piang   October 11, 2013 at 4:15 am

    A thok in a net tiang ka siar theh. A manhla nasa. Zuk pawl tla zoh a nuam zet.