Zalen le Rintlak a si mi Hrilawknak

Home » Cahram » Zalen le Rintlak a si mi Hrilawknak

By vcth on October 29, 2010.

Lungbawk brother

A zalen mi hrilawknak in hmailam rampi kaihhruaiawknak hrangah lamzin a sial sak. Hrilawk ṭheh ih cozah pakhat leh pakhat karlak thuneihnak an hlanawk tikah buainak a mal ter. Cozah ding lai khal an si le, an party a caklo cun, a cak tu party hnenah thuneihnak an pe cih. A zalen mi leh rinsan a tlakmi hrilawknak a si tikah, ziang ti hman in ti danglam theih a si lo.

Hrilawknak menmen cu ziang tik hmanah kan duh zetmi democracy ah in hruai lo ding. Ziangah ti le, thahrum hmang ih miuk tu pawl cun cozah thilri leh an milai pawl hmangin hrilawknak kha an duhmi result ngah ding in an cangvai thei lai. Cu ruangah, hrilawknak menmen cu rinsan ding a si tuk lo.

A zalen mi leh rinsantlak zet mi hrilawknak si ding ahcun a tanglam pawl hi an tel a ṭul tengteng:

Zo vek mi lai khal rammi a siih, a kum a kim a si ahcun vote pe theinak a nei ding a si. A biaknak, zumnak, kum upa leh nauta, mipa nunau sinak, milian le farah, politics ih a fehpi dan pawl ruangah thleidannak um lo in, kumkim mi hmuahhmuah kha vote thei nak an neih a ṭul.

Zo vek mi lai khal vote thlak ding in register an tuah thei ih, a duhduh nih hrilawknak ah an tel thei a ṭul.

A zuamawtu pawl in zalen zetih thusim theinak an neih a ṭul. Democracy daan vek ih feh ding cun, candidate pawl ih thusim dingmi remsak, khamsak, siannak pe duh lo ti vek a um lo a ṭul.

Vote nei thei mipi pawl cu ziang hman ṭihphannak um lo te’n an duhmi hrangah vote thlak theinak leh hriltheinak an nei a t’ul. Cubakah, cozah lam in silole, thuneitu ṭhenkhat pawl nih mipi ih thutheih theinak pawl a si mi radio, tv, mipi pungkhawmnak ih thurelnak pawl kha an phitsak lo a ṭul.

Hrilawk ni ah, candidate tu pawl kha vote thlaknak hmun pawl ah um ter ringring lo ding. Cun, hrilawknak ih ṭuanvo neitu, a bawmtu volunteer pawl, leh hrilawknak zohhliah dingih a ra mi ramdang mi siseh, party aiawh ih vote zohhliah tu pawl lawng in vote thlak nak hmun ah an um thei. Vote siar tik khal ah an mah pawl lawng an um ding.

Mi pakhat in midang zo hman ih theihlo in “thupte” vote a nei thei a t’ul. A san cu, vote pek tu kha leh hnu ah, ziang ruangah cumi kha mi na vote tiin mawh an phurh theilo nak ding, a humhimawknak hrang ah a si.

Me an siar tik ah, siar cia mi an siar sal lo nak ding in leh, hminlem hmang ih an vote theilo nak dingah, daan hngetkhoh zet neih a ṭul.

Vote pek dan cu a phunphun a um. Ram khat le ram khat a bangaw lo. Ram khat sung hmanah hmun khat leh hmun khat a danglam thei. Cuih vote pekdan pawl cu;

i. cahnah thawn: vote kha cahnah parah ngan in an pe ṭheu.

ii. Vote thlaknak ding ah, candidate pawl ih zuklem an tar t’heu, asilole an party zuk an hmang. Himi cu, ca siar thiamlo pawl hrangah a hleice ih tuahmi a siih, ca an siar thiamlo ruangah a zuk zoh in an hril duhmi kha vote an pek theinak ding hrang tumtah ih tuahmi a si.

iii. Electronic systems: himi cu ram cangkang pawl lawngih hman theimi vek ah a cang hrih. Computer sungih mah duhmi vun tawh zohzoh (touch-screen) vek a um ih, cu lo le hmetdingmi (button) te an tuah ih cu mi hmet men in an vote thei.

iv. Absentee ballots: himi cu hrilawk ni ih feh man lo ding pawl hrangah a hleice ih tuah mi a si ih, hrilawk ni taktak hlan ah an duhmi party lole candidate hrangah a hlan-khan in vote an thlakcia thei.

A tlunih kan simmi pawl a um lawngah a zalen mi leh rintlak a simi hrilawknak a si thei dingih, himi a um lawngah hrilawknak tluang t’en an t’heh suak thei ding. Cu bakah, hrilawk thluh hnu ih thuneihnak hlan awk tik khal ah buainak um lo t’en an hlan aw thei
ding. Cu tin, nuam tete’n, zalennak ram lam kan pan vivo thei ding.

Na ruahnak