Zarhte zingih hngahnak Bung 2, T 3

Home » Pursum » Zarhte zingih hngahnak Bung 2, T 3

By vcth on May 21, 2010.

Francis Cung Bik
Pa milain tong dingin ka tim aw. Ka pa hman a thinheng ve nasa, nauhak a zuamtai, nauhak pawl ih right a pahbal a tiih a phun a tlok. Ka pa cun nazi 1 pia 25 tal na ngah lo ahcun cawl mei aw in ti. 
Zinglam nazi 8:00 ah Mike te inn cu ka thleng. Mike’h pa cun, ‘to aw, na caan thleng ding hngak aw,’ tiah in ti. Cun a zungkhan sungah a lut. A zungkhan cu zung tla a bang lo. A fate, a hlun, ol lo ti si ko.

Kiangkap ka cuan, Mike ka hmu lo. Malte cu ka mang a bang. Ka kap ah cu hmaisabik zarh ih ka hmu mi nupi nu kha a to. In hnihsan, kei tla mal lai cu ka hnihsan ve. 
Minutes 45 a liam zo. In ko hrih lo. Ka kap ih nupi nu tla a ṭhehnak Minutes 30 lai asi zo. Midang pawl tla an feh ṭheh zo. Zohman an um nawn lo. Hawaiian zing nitleu mawi ah an mi lengkhan thim sungah cu kei mah lawng ka tang. A zungkhan sungah hna a ṭuan rero ti ka thei, phone a biak aw tla ka thei. Ka um le um lo ti theh a thei nawn maw? Zianghman ah in siar lo rengreng. Ka thin cu a heng sinsin. 
Netabikah, 9:00 am ah, a zungkhan ihsin malte a rak suak ih a kut in ra aw tiah in kut in zap. 
Pa milain cun “thlahlawh ka lo ṭhan lo len na cawl tum silo maw?” tiah in sut. “Si ee, na ṭong vekin zianghman na tauh lo, sumpai hawl dan ka lo zirh ding in ti, zirh lamlam, na duh tawkin in sor men. Ka baseball hman tanta in hna ka ṭuan. Mi pawl ih an ti vek ngaingai na si, mi depde, hrokhrol le duhham. Hi ti na si ruangah na hnen ih hnaṭuan zohman an peih lo,” tin mitthli haal ruahro in ka sim. Kum 9 nauhak in upa pacang hmai ih thusim cu ol lo nasa. Ka ṭih ka khur phah nan, zin dang a um nawn lo tin ka ruat ih netabik ah ka puak ve ta. 
Pa milian cu a tohkheng ah vor aw phah in, ‘um, na tawk pam. Thlakhat hman kim hlan ah ka staff dang pawl vek na si thlang.” “Ziang ee?” ziang a ṭong ti ka thei thiam lo. “Hi ti ih in hrem rero hnakin cu ṭhaten in zirh sawn men ding na sinan,” tiah ka ti. “Ka lo zirh rero ko,” tiah dimten in ti.
Thinheng zetin “ziangsi in zirh, zianghman. Hna ka ṭuan hnu in voikhat hman in biak dah hrih lo. Pia 10 nazi 1, huh cozah hnen ka lo sim le human right buar tertu tin ṭaza an lo cuai ding.” 
“Wow, na thil cu ka hnen ih hna a rak ṭuan dahtu ka ban ter mi maw, an mahte bang mi pawl vek na si thlang. Khah si le ziangruangah zianghman ka lo zirh lo tiah na ti thei?” “Voikhat hman in biak dah lo mi cu ziangtin in zirh tin ka ti thei ding.” 
Pa milian cun, “zirhnak ti hi cafung le cahnah thawn zirh aw lawngah zirhnak a si maw?” “Si ko lo maw” tin ka let.
Pa milian cun, “hi hi tlawng ih an lo zirh dan a si. Nunnak ih mi a zirh dan cu cutin a silo, nunnak hi in zirhtu saza ṭhabik cu a si. Caan tampi ah nannak cu a ṭong tam lem lo, asinan na dunglam in a lo tul. Na dunglam in ‘tho aw, tho aw’ thil lo zirh ding ka nei a lo ti.” 
Ziang a ti duhsan ti ka theithiam lo. Hi pa hi ziangsi a tlok rero tiah keimah ten ka thinlung sung ten ka sut aw. Pa milian cu a ṭong a peh. “Nunnak ih a lo zirhnak ah na ti ṭha a si ahcun na hmailam khua a tluang ding. Na zir thiam lo ahcun nunnak in tu vekin a lo tul rero ding. Minung phunhnih an um. Mihret cu an nunnak ih tulnak kha an tuar rero men. Mihrek cu an thinheng ih an tul ve sal. Ziangtin an tul sal tile, an hnaṭuan, an boss te, an nupi le pasal cu pawl parah lungkim lo in an tlok an ciar.”
Ziangsi a duhsan!
“Nunnak in kan zaten in tul ṭheh. Mihrek cu a sung an khan. A hrek in a let , an do sal. Mimal tak lawngin fimnak an zir ngah. Nunnak ih tulnak kha lungawi ten an cohlang.”
Pa milian cu a tho, rem a ṭul zo mi, zaanthing hlun zet thawn tuah mi a sangkate cu a khar. “Ka simmi na theithiam a sile fimnak na ngah ding, cuhlei ah milian le nun nuam mi mino na si fawn ding. Ka simmi na theithiam lo a sile na nunnak cu tlok cia ringring, hnaṭuan ṭha lo, boss ṭha lo cutin na caan a cem ding.”
Pa milian cu a thusim ka ngai ṭha le ṭha lo ti in zoh. A mit le ka mit an tong aw dukdi. A mit ka zoh in duhsaknak tumpi thawn thu i sim ti ka thei. Cun tawkfang kan zoh aw in ka mit ka phial. Si, a dik. In zirh aw tiah keimah in ka dil. Tu ka mawhthluk sal. A ṭong a peh sal.
“Zuamnak, tumtahnak nei lo mi na si ahcu nunnak ih a lo tul tinten cawl, baang le sungkhan na duh ding.”
“Ka hnen ah hnaṭuan tu 150 leng lo ka nei. Zohman in sumpai hawl daan in zirh aw in ti dah lo. Nang le Mike hi a pakhatnak ih sumpai hawl dan in zirh aw in ti tu nan si. Ka staff pawl cu ka hnen ah hnaṭuan rank kai ding le lahkhah ṭhan ding lawng in dil. Nan ziangtin sumpai kan hawl ding, pursum fimthaimnak ziang a si ti zohman in in sut dah lo. An nunnak cu peisa thlahlawh mal te hrangah a cem men.”
“Mike in sumpai hawl daan na zir duh ti in sim tikah a tak nunnak (practical life) tawn a nai aw bik ih zirh aw thei ding in khua ka khang. Curuangah pia 10 lawng ka lo peknak a si.”
“Nazi pakhat pia 10 in ziang zirnak si ka ngah?” “Hlawh man a mah tuk, mi ṭha lo na si” ti pawl… “ha.. ha..ha.” Pa milian cu hni phah in a ṭong a peh.
“Khah le, thleng awnak ti hi a thupi nasa. Keimah hi thubuai (piahtana) a si tin na ruat ah cu kan nunnak i thleng ter a ṭul. Cu vekin nangmah le nangmah piahtana na si tin a ruat aw le cu na thleng aw a ṭul. Cule cui thleng awnak in zirnak na ngah ding, cun na fim deuhdeuh ding. Theih ol ding in ka lo sim ding.”
“Na piahtana ruangah in mawh thluk hlah aw.” “Nan, nazi pakhat pia 10 lawng in pe si”
“Na hlawhman a mah mi cu ka buainak a si lo, nangmai piahtana a si. Khah le, hi vek tik cu caan na ton tinten keimah hi piahtana ka si tin a thinlung sungah ret ringring aw.”
Ka rak timtuah aw vekin ka duhmi hmuahhmuah cu ka sim ve, “ziangkhal lole, thlahlawh in ṭhan lole hi hnak ih upatnak ka ngah lo ahcun ka bang si ko.”
“Tha ee, mi zaanran pawl, mi tampi hi tin an rak si dah cio. Cun an cawl, bang. Hnaṭuan dang an hawl, thlahlawh sang deuh an hawl. Lahkhah sang deuh an ngah le an piahtana a reh ding an ruat. A taktak ah cu a rak si cuang lemlo.” 
“Si le ziang in an piahtana a reh ter thei ding?” “Um, hnisiamsi ten hih a mal zet mi nazi pakhat ih pia 10 lungawi ten co hlawng hi a si. Mi tampi thlahlawh mal tin an phun ih an to men. Nan mi hrek cu a mal mi thlahawlh an ngah ti an thei, an nunnak hrangah a diah lo ti an thei, hnaṭuan dang an ṭuan bet. An zuam sinsin. A malmi hlawhman tla an hlon cuang lo an cohlang.”
A kutzung in a lu a tok ih, “hihi hmang aw,” in ti. Na thluak hmang aw ti ai a si pei cu. Hih a thusim mi hi mizaran le pa farah hnen ih ka theih dahlo mi an si. Hi a ruahnak ruangah si ding Hawaii ih milian bik pakhat ih a can theinak. Asinan pa farah cu a nun sung sumpai hlawhsam in a caan a cem. Hih an ruahnak in an nun sung hmauhhmauh a dang lam ter.
Cucu kan zirh awnak in zirnak 1 nak a si.
Na ruahnak