Zawng pa (5) ih Thuanthu

Home » Cahram » Zawng pa (5) ih Thuanthu

By vcth on October 17, 2013.

Zawng panga

B.A (Thang), Salai

Scientist zungpi ah Zawng pa 5 kha khaan khatah an ret.Cumi khaan ih a laifang ah lilawn pakhat a um. Lilawn parah banhla thlar pi an ret. Zawng ti cu kan thei vekin banhla an duh tuk. Banhla an hmu tikah ei duh in lilawn par an kai ih an va lak tum. Zawng pawlin banhla an tham ngah zikte ah mahte tidai a suak thei mi cet te an ret. Cutiih tidai a ra suak mi cu zawng pawlin an ṭih zet.

Pakhat hnu pakhat kai in an lak tum.Ti a rak suak ih, an cawl sal. Cuhnu cu banhla kha an duh zet nan, zohman in ralṭha zetin an va lak tum nawn lo, dai ten an um. Cuhnuah Scientists pawlin cui zawng pa 5 sung ihsin pakhat kha an suah.
Cuthehle a dang zawng thar pakhat an lut ter sal. Zawng thar cu banhla a hmu tikah zawng daan ten, lilawn parah a kai tum. A kai tum veten, a um cia mi zawng dang pali in an thawi ih, an kham.

Cutin a zuam tinten, thawi a tong tikah cun, cui zawng thar cu ziang ruangah in thawi timi a thuhla a ruat thei lo nan, lilawn par kai lo ding timi kha ṭhaten a ruat suak. Lilawn par kai ding tla a zuam duh nawn lo.

Zawng thar pakhat kha zawng a hlun pakhat thawn an thleng lala ih… a hlan vek thotho in a cang lala. Asinan pakhat a um bet mi cu, mitu a mah hlan te ah lut mi zawng tla a thawi tu ah a tel ve. Cutin panga tiang an thleng hnu ah tla zawng thar lut pawl cu thawi an tuar ringirng lai ko.

Duhdawtmi rual le pawl…. a tu ahcun, cumi khaan sungah zawng thar lawnglawng an si zo. An zate… tidai an tong dah lo. Asinan, anmah sungih pakhat khat lilawn par kai an tum tinten, a dang a tang mi pa 4 in an kham, an thawi ringring. Ziang ruangah cutin an thawi timi cu… cui zawng pa 5 cun an thei lo.

Thuanthu cu cu hmuah asi ko.

Rual le pawl, cumi zawng pa 5 pawl vekin kan nunnak ah kan tong dah maw?
Kan hmu dah ko lo maw?………………………

Na ruahnak

One Response to Zawng pa (5) ih Thuanthu

  1. Pabawih   January 10, 2010 at 3:48 pm

    wow! himi cu, kan nih Chin mi pawl lak ih a tam bik ih kan hman mi zirhawkdaan vek a bang.

    Hotu/kan mah tlun ih ummi pawl nih tuahhlah an tih ruang lawng ah, a tthatnak leh a tthatlonak thei lo´in tuah lo ding ti ih kan cinken mi a um ah cun zawng thawn kan bang´aw tih nak a si in ka hmu. thuanthu ttha zet a si. lung awi!