Zawng Pahnih

Home » Cahram » Zawng Pahnih

By vcth on January 19, 2014.

two-monkeys

B.A (Thang), Salai

Minung timi hi ramsa phunkhat kan si. Curungah ramsa vekin kan sual palh ṭheu. Kan sual mi sungah tla kan hmu dahlo, thei dahlo mi kha midang pakhatkhat in in sim ih kan zumnak le kan hmuhton dah mi pawl kha hlon in midang ṭong mi kha kan zum ṭheu. Kan zumnak pawl hlon in midang sim mi zumnak in kan sual mi tla tampi a um ṭheu.

Himi thu thawn pehpar in research tuah mi pakhat ah hitin an ti. Voikhat ah research tuah tu pawl in zawngte pa 2 kha an suak pek te ihsin an research khan sungah an ret. Cumi khan sungah zawngte pa 2 le rul, maimom, le a dang tur nei mi pawl thawn an ret tlang.

Cutin zawngte rualvah cu an rak ṭhang. Asinan, anmah thawn suak pet ihsin ṭhanglian mi rul, maimom, le a dang tur nei mi pawl ṭih ding ti an thei lo. Nauhak lai ihsin um tlang mi si tikah hi pawl hi ṭih ding tin an rak thei lo.

Cutin kum khat a rak kim tikah cumi sung ihsin pakhat kha an lak ih a lengah a nu leh a dang zawng pawl thawn um tlang ding in an ret. Cutin zawng te cu rul pawl a hmu tikah a va tham tum ih zawng dang pawl in an kham, an kok. A kham tu pawl tla thingkung parah an tlan, an kai. Zawngte le ziang hman thei lo pi in a kai ve. Zawng dang pawl in “rul timi hi tham ding silo, thi thei” tin an ti.

Cutin zawngte cu khan sung um lai ah a thei dah lo mi pawl hi a lengah zawng dang pawl in an zirh, an sim. Cutin thla khat lai um hnu ah zawngte kha an kai sal ih research khan sungah an ret sal.

Zawngte cu a hlan amah thawn kumkhat um tlang mi zawngte vek si nawn lo in, khan sung ih um mi rul, maimom le turnei dang pawl in in that thei tin thingkung par in a ṭum duh nawn lo.

A rualpa zawng pakhat in a hlan vek lek ding a ko hman ah a thinlung sungah hi pawl hi mi siatsuah thei tu an si tin a thinlung sungah a retih a leng zawng pawl ṭong mi kha amah rori in a tong dahlo nan a zum zo.

Ngaingai cu himi zawng lawng asilo. Minung kan mah tla cutin kan si ko.

Leilungpi ah caan tawite sung kan rak um tikah- kan mah rori hmu/ton/thei/relcet hnak in a hlan mi pawl in an sim mi kha kan zum sawn ṭheu. Kan hmailam u leh pawl le anmah rori thei hnakin a hlan mi pawl sim mi kha a lu sungah a ret.

Curuangah minung pakhat a thu kan thei hrih lo nan “Hipa hi hitin asi” tin midang pakhat in sim mi hi kan thinlung sungah kumkhua a rak um ṭheu. Hi pa sim mi asi maw? Si lo timi kan mah rori tla kan ruat a ṭul.

Ok, thuanthu te cu hi hmuah in asi.
Cuhnakin… a tu ca sair tu nangmah teh… a sung ih zawng maw??? a leng ih zawng maw???
Keimah cu…………..

Na ruahnak