Ziangruangah Jerusalem hi a thupi?

Home » Cahram » Ziangruangah Jerusalem hi a thupi?

By vcth on December 8, 2017.

Jerusalem hi leitlun ih khawpi thupibik pawl lakih pakhat a si. Ziangah tile leitlun biaknak sakhua pi pawl lakah a tumbik pathun a simi Judaism, Christian le Muslim pawl hrang ih khaw thupi tak a si.

Santhar Jerusalam khawpi hi peng 48 vuakvek (sq ml) a kau, mipum 1,253,900 tluk an um. Asinan tuisun ni ih an buaipi zetnak hmun cu Jerusalem khaw hlun a si. Jerusalem kha hlun ah quarter pali (veng li) a um, cu pawl tla cu Muslim Quarter, Christian Quarter, Armennian Quarter le Jewish Quarter tla an si.

Jerusalem khawpi hi voi 50 lenglo do a tuar ih voi 44 mi kuthnuai ih um khawpi a si.

Jerusalem khawpi cu kum 3000 tluk a si zo mi khawpi a si. Jew mipi hrangah ziang tluk in a thupi ti cu sim ciamco a ttul lem lo ding ka zum.

Jerusalem cu Siangpahrang David ih tonak hmun a si. Cun Jerusalem Biakinn pi a sak ih a fapa Solomon san ah ra ttheh a si. Cutin Israel le Judah Siangpahrang a sansan in Jerusalem cu thupi zetin an ret. Babylon sal an tan lai ah tla Jerusalem cu an ngai, an ttah hnawh mi khawpi a si. Persia sal an tan ah tla Jerusalem khawpi tungding sal dingin nasa ten ttan an lak.

Rome cozah hnu in Jerusalem a lak hmaisabiktu hi Muslim pawl an si. AD 630 hnu in Muslim cu nasa zetin a karh. AD 638 ah Jerusalem tla Muslim pawl kutah a thleng.

Europe lam ih Khrihfa pawl in Jerusalem khawpi Muslim kutsung ih um cu a cang thiamlo an tiih cutin Muslim le Khrihfa lakah ralpi a tho. Cui ralpi cu Crusade ralpi tiah an ko. AD 1099 ah Khrihfa pawl in Jerusalem an lak thei sal.

AD 1187 ah Jerusalem ah General Saladin in a lak sal ih Muslim kutsung ah a thleng lala. Cutin Muslim pawl in kum 700 sung an rak uk. Ottoman Empire sungah a rak um.

1917 ah General Edmund Allenby ih ho mirang ralkap pawl le Ottoman Empire (Tuisan ahcun Turkey) cu nasa zetin an do aw. General Edmund Allenby in nehnak a ngah ih Jerusalem le Palestine cu Mirang kuttang ah a thleng.

Jew ramduhthang pawl in Zionism ti cangvaihnak tumpi an nei ih leitlun khawzakip ih um Jew pawl cu Jerusalem an pan cio. Hi mirang uk sungah Jerusalem ah Jew mipum a karh cak nasa.

Garmany ram ah Adolf Hitler in Jew mipi million 6 lai a that tiakah UN tla in Jew pawl hi ram nei ding hrimhrim an si tiah 1947 ah ram nei dingin an ruat sak. 1948 May 14 ah Israel cu ram pakhat a si tiah UN in a than. Cule veten Arab ram pawl kom aw in an bur ciamco. Asinan Israel in nehnak a ngah ih Nitlaknak lam Jerusalem tla a lak thei.

1967 ah Niruk ralpi timi Israel le Arab ram pawl an do aw lala. Niruk ralpi ah Israel in nehnak a ngah ih Jerusalem Nisuahnak lam tla a lak bet thei. Asinan Jerusalem khaw hlun cu an ramri ah a um. Palestine pawl tla in Jerusalem cu Palestine ih khawlipi ding ah an duh ve.

Muslim pawl hrangah teh ziangah Jerusalem hi a thupi ve. Islam dintu Muhammad cu AS 632 ah a thi. Muhammad a thih hnu kum 5 ah Muslim pawl in Jerusalem cu an lak.

Muslim pawl in Muhammad cu Mecca ihsin Jerusalem ah a tlawng ih Muhammad cu Jerusalem ah Prophet hmuahhmuah thawn thlarau lam in pawlkom awknak an nei tiah an zum.

Jerusalem cu Muslim pawl hrangih an khawpi bik a pathumnak a si. An khawpi bik cu Mecca (Muhammad suahnak) le Medina (Muhammad thihank) a si.

Pengkhat vuakvel a simi Jerusalem khawhlun sungah Muslim Mosque 7 a um ih cumi lak ah Dome of Rock timi le Al-Aqsa Mosque tla cu Muslim biakinn hminthang an si.

Dome of the Rock

al-Aqsa Mosque

Khrihfa pawl hrangah tla Jerusalem cu hmun thupi zet a si. Jerusalem cu Thukham hlun sungih an hmun thupi a si. Culawng siloin Jesuh suahnak Bethlehem cu Jerusalem kiangte ah a si. Cun Jesuh Khrih tla Jerusalem ah a tlangleng, thuthangtha a sim. Cun dungthluntu pawl thawn netabik zanriah a einak hmun, leitlun mipi usalnak tlen dingih a thihnak hmun pawl a si.

AD 200 hrawngah Rome Siangpahrang Hadrian in Jesuh an phumnak thlan ah biakttheng a sak. Kum 100 a rei hnu ah Rome Siangpahrang Constantine cu zumtu ah a cang ih Khrihfa biaknak cu zalennak a pek. Cun Siangpahrnag Hadrian ih rak sakmi biakttheng cu Biakinn ah tuah a fial. Hi biakinn cu “Church of the Holy Sepulchre” tiah kawh a si. Khrihfa tampi in hi biakinn hi hmun thianghlim pakhat ih an ruahmi a si.

Jerusalem khawhlun ahhin Khrihfa biakinn 16 tluk a um. An zaten biakinn tumpipi an si.

Church of the Holy Sepulchre

Tuitum ka nganmi hi Santhuanthu le Biaknak lam ih a thupitnak deuh in ka ngan. Ramkhel lam, Israel ram hrang le Arab ram pawl hrangih a thupitnak tla rak ngan kan zuam leh ding…..

Na ruahnak