Zinghnam le Cahnah

Home » Cahram » Zinghnam le Cahnah

By vcth on June 10, 2010.

 B.A (Thang), Salai

Ka khan sungah zinghnam pakhat a lut ringring. Hi zinghnam hi thihsi (poison) ka pek mi tla a ei loih hlei ah, a phunphun in kai thei ka tum rero nan, ka ngah dah lo. A fim zet mi zinghnam pakhat a si tin ka ruat. Zaan ah in buai pi nasa ih ṭhaten ka it thei dah lo.

Cutin zinghnam kai thei dingin a thuhla nasa zetin ka hlethlai. Ka zoh tikah zinghnam hi ka sangkate ihsin ka khan ah a lut timi ka thei ngah.
Ka sangkate ih thirsur (tanzakar) kha a siat ter ih khua a thim veten ka khan ah a lut ih zing khua vang tikah a suak sal ṭheu.

Ka rual pa kha himi thu ka sim tikah a hni. Cuhnuah himi cu ol sam tuk si. Zinghnam ih a siat termi a ong ah cahnah pakhat thawn na kham men ding siko tin a ti. A ṭong mi ka zum lo timi a thei ih amah in ¨thu ngai, tuah san ko aw¨ in ti. Ka zum lem lo nan, ka rualpa tivekin ka rak tuah san.

Khua a thim ih zinghnam cu ka zoh. Cahnah paa te pakhat in zinghnam cu a kham thei ding maw si tin ka ruat. Ka zum lo zet nan ka rualpa sim vekin a rak cang. Sangkate a leng ihsin zinghnam cu khan sung a lut thei lo ih a thin buai rero. Ngaingai ahcun a kut thawn, silole a luu thawn nuamte a tawt sehla a lut thei ding mi a si. Asinan zinghnam in cutin a tuah lo. A haa thawn lawng a tuah thiam mi zinghnam cu cahnah kha a thlek thei lo. Cahnah te pakhat ruangah a fimnak pawl cu zianghman hmang thei lo mi ah a cang cu mangbang um zet si.

Cumi hnu cu ka khan ah zinghnam a lut thei dah nawn lo. Cahnah te pakhat in a kham thei. Himi thu hi ¨ziangruangah¨ timi ni rei nawn ka ruat ringring. Netabik ahcun kan thu ruahnak ruangah a si tin ka ruat suak.

Ruahnak pakhat lawng kan ruat ṭheu ruangah a si tin ka ruat ngah. Kan hmuhton mi harsatnak, dawnkhamnak le buainak pawl hi zinghnam a rak kham mi cahnah te pakhat vek a si.

Harsatnak, buainak, dawnkhamnak pawl kan tong tikah kilkhat lawng in ruahnak lole ruahnak pakhat lawng, lungkhatpu, ti pawl hi kan thleng thei a si le ruahnak thar thawn cahnah cu ol zetin kan thlek thei ding ti a fiang zet mi thil a si.

(Original writer- Xi Wan)

Na ruahnak