Zinghnam Pacang Pawl Ih Thuruat

Home » Cahram » Zinghnam Pacang Pawl Ih Thuruat

By vcth on September 21, 2013.

Hitik hlanlaiah, zinghnam pacang pawl thurel khawmnak an nei. An rel mi thupi, agenda cu ziangtin zawhte ral ihsin kan luat thei ding ti a si. An khua ah zawhte pacang tumtak pakhat a um ih cui zawhte in zianghamn pawl deh ringring. Tu zinghman pawl an ci a mit zik thlang. An miphun, khua le ram ṭhansonnak le humhimnak hrangah zawhte ral ihsin an luat a ṭul.

Zinghnam Pacang Pawl ih Thu

Thu le hla a phunphun an ruat. Ruahnak an bur cio. An zate lungkim mi, an thu relcet mi cu zawhte a hngong-ah Kawn (khawnglawng) kan orh sak ding. Cuti kan ti a sile zawhte a ra le a Kawn (khawnglawng) te a awn dingih ka ralring thei ding, cule zawhte ral ihsin kan luat ding ti a si.

Cui ruahnak cu a ṭha an ti cio. A lungkim lo tu zohman an um lo. An kut zungpi tla an tung ih good an ti aw rero. Meeting ṭhenkhatnak an ṭheh. Ziang kan tuah ding ti mi hrangah ruahnak ṭha zet an ngah zo. An meeting ṭhenhnihnak an peh. Zo in cui khawnglawng te cu zawhte hngong ah a orh ding? An ciamkhap lo reai. Ṭhimte tlak awn hman theih a theih. An dai ṭhepṭhep. Pakhat le pakhat an tun aw. Nang, nang, nang an ti aw nan zohman a feh suak ngamtu an um lo.

Caan tampiah miphun hrang, khua le ram hrang, kawhhran hrang, pawlkom hrang ah thu le hla ṭhaṭha kan ruat ṭheu ko nan cui thu le hla pawl kha an ziam sal ṭheu, khoi ti le tlang hman an thleng thei lo. Ziangah tile ka pa ih ṭong von sang ta sehla “a meiih pawk ngam tu”  kan um lo. Ziangmi ti mi hi kan buaipi mi a si lemlo, zo ti mi sawn hi a si.

Pumpek ti hi thil harsa zet a si. Keimah ten ka ruat ṭheu, tu-ah mi pakhat in na innsungsang tan tahrat in kan ram hrangah na nunnak na liam ding in ti sehla……… mei thupin “tlangak hman a ṭih a hrut ih a san a sau” ti lam pang in ṭan ka khuar men ding. Duhdawtnak kan timi tla cin le ri an nei ṭheh. Khatlam-ah kan nunnak, kan innsungsang nunnak cu pawl a rak ṭul si. Ṭong dang in cucu milai daan kan ti ko pei.

Ram thu le hla, khua le ram thu thawn pehpar awin kha tin rak tuah uh, cutin rak tuah uh tin caan tampi ah kan fial aw ṭheu. Pumpek ṭulnak fangte kha mi sa vo ah kan voh ṭheu. Mi kutih rul kaih tum kan bang.

A sile hih kan dinhmun pawl kar lakin ṭuan thei ding mi ziang kan nei? Ṭuan thei dingmi tampi kan nei, kanmah le ti thei tawk, kan ruh le rang ih ban tawk, kan thi le thazang ih ngam tawk ih hmai nor cio ding kan si ko. Mi mawh thluknak, fialnak aw kam pawl hlon in sawmnak, duhdawtnak aw kam thawn kan feh tlang le a ṭha sawn lo pei maw!
Culo cun Zinghman pacang pawl kan hluan pang ding.

Francis Cung Bik

Mirang thuanthu tawi sirhsan ih ngan mi a si

Na ruahnak