Zo In A Bawm Ding?

Home » Cahram » Zo In A Bawm Ding?

By vcth on December 14, 2013.

Salai No Hmung

A khuh a khuh tinte’n thi cu thi cu cawl a tum nawn lo bang. Hmu dah lo tu hrang ahcun ṭihnungza asi ko ding nan Thangte hrang ahcun ziang hman asi nawn lo. A ka sung, dang sung, cuap sung ih thi pawl an phut rero nak a rei tuk zo. Midang ka sung ih pawt mi khal voi tam pi a hmu zo. Midang timi ah midang pi ngaingai an tel vekin a duhdawt zet mi a nupi le a fanu te an tel ve.

Kaa sung in thi tu le tu a suak hnu ziang vek ram ziang vek mual ah an kuat ti cu a thei tuk lawlaw. Asi ko nan Thangte in thih ding cu a ṭih lo. A kaa sung ih thi le hnai phui ṭul ringring ruang khal ah a raih a sia lo. A it nak kiang asi lole a tho thei nawn lo ruangah a lum nak pher te kiang ah zial ong pakhat a um. A hrang ah zial ong cu a ṭhahnem zet. Zial ong ti cu cil dongnak bel vekin ṭhawn ruri a ṭul lo. A bung pang pei maw, a liam zik maw ti’n thin phan a ṭul lo. Kholh ṭul rero lo. Zial ong in a tang lam cu von bih ngam ding asilo. Sung tol za ngaingai asi. Asinan Thangte hrang ahcun mangbangza, thil rap thlak asi nawn lo.

Ngaingai te’n ti le thihnak ti mi thu ruatnak ding ṭhazang khal a nei nawn lo. A thei aw thul, a hngilh aw thul. A thei aw lo caan khal a tam deuh vivo. A caancaan ah ka thi zo maw ka nung lai si a ruat sal . A thei aw ngaingai lo. Thi ding mawi cu asi zo. Phoih sehla cu a cem si men nan. Cuti’h a hnuk cat thei lo ding in a kai tu a um. Cumi cu Hmungte asi. Hmungte teh zo in so a run zoh ding, a run bawm ding. A pa kei mah rori hman in ka zoh ka bawm thei lo mi zo in so a zoh ding. Ka thih hnu mithmai nei lo in mah vek farah zonzai pawl, mi na pawl, mi har sa pawl, nu le pa ṭhiṭha nei lo pawl um nak veng, hi veng sai ah kan tan ta le Hmungte hrang ah ziang ruahsannak si a um nawn ding.

A tu hman khuhkhuh tik ih thi tel mi nat sia TB nat kha ka son ngah zo. Mi nu le pa cun an fa le hrang ah sui le ngun, inn le lo ṭhaṭha an roh ta lai ah kei cu thihnak ro maw ka lo roh ta ding. TB hrik an ti. Mit in hmu theih cu asilo nan taksa sung an vah can ahcun tuar a har zet. Dang sung, cuap sung ah a cang hluah hlo ṭheu.

Hi hrik pawl in ka fa pa ih taksa cu an khawih, an cok, an ei ding. Cun ka fa pa te cu kei mah bang in thih sia in a thi ding. Ka duhdawt zet mi ka nupi khal a thi zo. Hmungte ih kum hnih U, a uu khal pa hrangah tuarharnak beidongnak pawl tanta in in thih san zo. Ka nupi nat sia rak petu cu a hring tu a nu asi. In ei hawl phah, khat lamah dam lomi a nu a zoh pah in a rak zonzai zet . Cuih fala no a lai nat tu cu Thangte. A pi ding cu sii le vai in a zoh. A tuam hlawm. A thi hnu rei lo ah a duhdawwt zet mi natnak nei fala no kha a ṭhit. An nei aw pek ahcun a thleng tuk lo . A rei deuhdeuh ih a lang deuhdeuh. Fanu pakhat le fapa pakhat kan nei hnu sii zung le inn khui deuh ah si kan um ti ṭhei a har. Neihnak in a ban lo ruangah mi nung pawl umnak leiram cu a tan ta. A fanu te caanah cun kut ke nei lo vek asi. A nupi lai vekin sii le vai thawn a zoh thei tuk nawn lo.

Hiti’n ka fa nu mual in liam san ding ti thei na cing in mual ka liam ter. Cu lai caan ih a ti thei sun cu a ṭuan thei mi hnaṭuan hmuahhmuah an pek zat in a ṭuan. A colh caan ah duhdawt lainatnak tum pi thawn a pom ih ṭha a pek.
Thi le hnai pawl fih lo ten a hnawt sak ṭheu. A hnawt sak ṭheu ruangah a sung ah thinak hrik sia pawl an lut. An rak lut ding khal a thei tuk. Nupi le fanu neih le siah thawn a bom thei lonak pawl, a beidongnak pawl kuan sal thei ding dan a ruat tik ah hih lamzin lawng a um. Curuangah lam a ong sak men. Thi ding , in that uh, ka nupi le fanu nan thatzo hnu hrik sia pawl kei mah cu ziang ka si ih in hlah.

Asinan Hmungte sia le ṭha hman thei hrih lo mi nauhnak te. Mifel mi ṭha nan um asile ra bawm hram uh. Hmungte, nauhnak te ziang thei lo in leilung pi ah a ra suak. Natsia tuarnak in a rei hlan ah a kir sal ding. A hrang ah leilung pi cu Hell ram asi ko.

Vok thih le ar thih in thi men lo ding in bawm tu pawl an um ti ka rak thei dah. Nu le pa nei lo mifarah pawl a bawm rero tu an um ti in rak sim dah, ca ah khal ka rak siar dah. Ka thi thlang ding. Zo si in bawm tu ding . Hmungte zoh tu ding teh zo hman an suak lo maw.

Kan veng ih Biakte maw, vedio sung ih ka hmu dah mi sawn maw. Thuthangca sung ih thil hlu thei zet tu pa maw. A thei ngaingai lo. A fiang nawn lo. Ziang si in pek lala, ei aw ee.. ziang le ziang si in ei ter.

.
A mawh lo a nih tla a thei tawk te’n in bawm ve mi si ko si. Zo si cu pa cu, kan pastor pa maw, ka veng ih Biakte ee…na thei lo ding ee…mi dang pi maw…
Thi luak pah, a duhduh tong pah in a thaw a cem. A ruak cu Biakte in rei nawn a zoh ta. Cu’n inn kiang kap pawl a ko. Hmanhmawh ciam co ding khal a um lo. Ziang tik si ding ti’n a rak zo cia mi si ko . Mi kip ih theih asi.

Hmungte cu an hawl. Inn hni inn thum dan ah a lek rero. A leknak in a ra. A pa ih ruak cu a hmu. Zam rang te’n a tlaan, a pom, a ṭap…a ṭap nasa.. “Ka pa in tan ngaingai maw. Ka lo duh in ti ta lo maw… ka pa … in hruai ve aw… nu le pa u le nau nei lo in kei mah te lawng… in tan siang maw si … ka pa… ka lo tan san lo ding in rak ti ta dah ko lo maw… ziangah in tan … in rak zoh sal aw… ka pa … ka thi lo ding ka fa siizung ka feh pi ta ding na ti si lo maw…ka pa aw..ka pa nang mah lawng thi hlah kei tla ka thi ve ding. Ka lo thlun ve ding.. In tan siang hlah, a tu ka khuh le thi a tel ve zo. Zo nih si in zoh in bawm cuang ding…ka lo thlun ve ko ding … maw ka pa… maw .. ai….

Hmungte cu a ṭap phah in a khuh. a sim vekin a khak sung ah thi a tel. a pa’h kiang zial on in a phui.

“ka pa kei tla thi a tel ve zo si..ka lo thlun ve ding maw”
Inn kiang pawl cu an mit thli a haal . Asinan an bawm thei ve lo. An mah lak in zo si Hmungte bawm thei tu ding um. An um lo. Lungzur nei pawl cu an mitthli a thla. Mithli thla duh lo pawl cu a dang a hoi.

Hmungte…….Hmungte
Hmungte teh zo in saw a bawm ding…. zo nih si a zoh ding????

Ref: Phay Myint’s who will treat Maung Toe siar mi parah a rem daan in leh sal mi a si.

Na ruahnak

One Response to Zo In A Bawm Ding?

  1. Anonymous   March 10, 2010 at 6:15 pm

    A tha nasa, Rak ngan zel aw, ka rak siar ringring ding. A tha ka ti tuk.