Zo Thawn Hman Bang Ka Duhlo

Home » Cahram » Zo Thawn Hman Bang Ka Duhlo

By vcth on September 16, 2013.

B.A (Thang), Salai

Tipi kap um khua pakhat ih um ka si. Cui tipi cu a tum tuk lo nan, thli cu a tam zet. Zaanlam tin te exercies tuah dingin ka va feh ṭheunak a si. Tuni cu—tipi kapih lungto parah to in thu ka ruat. Cumi cu– Thuanthu pakhat a si.

Ka thuanthu cu hitin a si:

Voikhat ah tin-baw (lawngpi) pakhat cu—Tipi thuanthum ah an feh rero lai fangah thilsia, ruahsia nasa zetin a hrang ruangah cui lawngpi cu ti sungah a pil ta. Lawngpi sung ummi lakin minung 7 lawng an luat ih- Lawng pakhat thawn an rak hmuak.

Thi loin lawngte parih an thleng mi hi an vanṭha tin kan ti thei pei maw? Lawngte parah minung 7 an um. Cumi sungah mi pakhat cun a vanṭha ih lawng parah a thleng tin a ruat lo. A mah hi thil hmuh daan a ṭha zawng in ruat theilo/ hmu thei lo tu “Pessimist” pakhat a si. Leilungpi ah a ṭha timi pawl hi ngaingai ahcun minung pawl kha harsa sinsin dingih a bum rero tu a si. Curuangah a ṭha timi pawl hi ngaingai ah a ṭha a silo tin a ruat. Atu tla kan lawngpi a siat ih lawngte parah kan thleng mi hi kan vanṭha ruangah asilo. Harsa/Rathei tuar ding caan sau sawn ding hrangah a cang mi thil pakhat tin a hmu.

Lawngte parih a dang pakhat cu- mah hrang lawng ruattu “Egocentric” pakhat a si. Amah hrangah taksa lam le paisa thilri ziang hmuahhmuah mi hnakin ngah sawn a duh mi a si. Atu lawngte parah tla nuam te um theinak ding hrangah itnak hmun kau nawn a lak ih a zau lohli.

Lawngte parih a dang pakhat cu- A thazawng ih hmu thiam ringring tu “Optimist” pakhat a si. Optimist pakhat si vekin– a hlatpi kha a zoh ih– tikap kan thleng zik ko ding tin a ṭong phah rero.

Lawngte parih a dang pakhat cu- thu thei duh zet mi “Observer” pakhat asi. Observer pakhat a si vekin Tipi ih um daan, wave pawl ih a feh daan, lawng parih minung pawl ih um daan, ei le inn um lo ih an buai daan, lawng a siat rero mi pawl le a hmu mi hmuahhmuah record a tuah tum rero.

Lawng parih a dang pakhat cu- midang bawm mi hi a ṭha tin ruat mi le a tuah ringring tu “Altruist” pakhat a si. Midang hi bawm ringring ding a si. Midang pawl bawm ding lawnglawng a tum rero.

Lawng parih a dang pakhat cu- A ṭha mi le, a ṭha lo mi pawl hi mah lawng thei in kan tuar ringring ṭheu ti tu “Stoic” pakhat a si. Zianghman tla a zum lo. A zum mi cu- Tipi sungah mah le mah ka that aw men ding tin a ruat rero. Ti sung dawp ding maw dawp lo ding ti a ruat rero.

Netabik pakhat cu- leilungpi ih thu ziang hman thei hrih lo mi nauhak te pakhat a si. Tikap thleng loin zaan var tipi sungah lawngte thawn um ding tla a ṭih lo. Thilsia ra sal ding ti tla ṭih ding a thei lo. Cui nauhak pate cu lawng a siat le a siat vekin ti sungih pil ding a si mei. Cumi hrangah ruat tla a thiam lo, ṭih ding tla a thei lo.

Lawng parih minung pa 7 hi leitlun ah a cang ṭheu mi thuhla pa 7 kha sim duh mi a si. Leilungpi parah a ṭha zawng in hmu tu tla an um. A tha zawng in hmu nan, ngaingai ah a ṭha mi pawl ṭuan thei lo tu silo ding tla a ṭul. A ṭha lo zawng in zohtu, hmu theitu tla an um ding. A ṭha lo zawng in zoh tuk ruangah kan thinbang ding ih ziang hman tuah thei nawn lo ding vek cang lo ding tla a ṭul.

Mah hrang lawng ruattu pawl tla an um. Cumi pawl cu mi dang pawl ziang tluk buainak an tong hman sehla… poi lo tin an ruat. Cumi ruahnak thawn mai lennak lawng ruat in leilungpi siatsuah tertu pawl an si. Midang bawm ding ruat hi a ṭha tin ka hmu. Asinan, himi vek minung pawl hi leilungpi ah mi mal zet an si tin kan hmu thei.

Nauhak te vekin le zianghman thei lo, zianghman thupit ter loin a cang mi vekin umtu pawl tla an um ding. A caancaan ah cang, siat caan ah siat in amah te a ṭha leh ding tin ruat pawl tla an um ding.

Tampi an um ding tin ka ruat rereo……….

Kei teh khui vek minung ka si pei tin ka ruat……
Khuimi sungah hman ka tel duh lo tin ka thinlung ihsin ka ṭong laiah— ka tonak lungto ah tisuar cu— na nawn in a rak thleng
Kei tla ka ciar ṭheh……
Tipi thuanthum ih tisuar aw pawl tla in hnihsan rero tin ka ruat ngah………….

Hmuhdaan dangdang

Na ruahnak

One Response to Zo Thawn Hman Bang Ka Duhlo