Zo Kan Si

Vancung Thaihlio timi cu Falam khuasung um mino hrekkhat in Feb 14, 2003 ah rak din asi. VCTH cu pawlkom (organization) ti hnakin calai ṭhianrualkom (friend club) ti sehla a sual lo ding ka zum. Kan Chin lole Falam Calai um daan kan thlir tikah van ihsin, a sangnak hmun ihsin rak tlak mi calai lawnglawng deuh a rak tam. Tah ṭhimnak ah, Megazine pawl le cauk rak suah mi pawl a tam sawn cu biaknak lam lole phunsang tlawng lole calai pawlkom FLS or CLF tivek ih rak suah kha asi ṭheu. Mizanran mino leng le val tampi cu cahram, biazai tete rak ngan cu asi ko nan an zal sungah maw, cabu sung ah maw cutin um hmun nei lo in a rak ziam ṭheu. Curuangah mizaran mino tampi cu calai thawn kan/an hlat aw vivo. Mizaran, mino leng le val an thinlung sungih thuh mi calai thiamṭial phorhsuah thei tu sihram seh ti ruahsannak thawn VCTH cu rak din asi.

Kan rak ṭuansuak mi pawl, thla khat voikhat thuthang cazual kan rak suah; calai, ram thu le hla thawn pehpar aw in seminars kan nei; khuasung mino pawlkom awknak a hnget khoh sinsin theinak dingah bawhlung lehpannak nei a siih VCTH club din asi; khua le ram ṭhansonak hrang ah thazang thawn, dawhhna lamah, lamzin sial, lukaape kan pok ṭheu; Friday club kan ti ih tlawngkai ni nga zaan tinten khuasung kum upa hlanlai thu thei deuh tu, ralbawi rak ṭuan dahtu, niangnganzi tama(politicains) tivek pawl kan leng ih thu nuam rel khawmnak kan nei ṭheu.

Cui rak ṭuansuaknak ihsin kan mino lak ah ṭhansonak tampi in pek in ka hmu, Ca a ngan dah lem lo pawl tla ca an, kan ngan. Cui kan ngan mi ca cu kan rualpi pawl in an siar. Mah rualpi te ngan mi ti cu an siar ve ṭento ko. Cuhleiah VCTH in ca ngan thiam thar leh quality a nei mi baizai pu le pi pawl tla a rak sarsuak. Calai lawngah siloin Upa pawlih an theihnak in hlawm mi, ruahnak in pe mi pawl, mino pawl thawn kan rak pawlkom aw mi pawl tla cu tuni tiang man a nei zet mi, kan nun ih a hngilh thei lo mi camkhat caan a rak si.

Thu le hla a phunphun, dinhmun a phunphun, thlihrandaan a phunphun ruangah a duhdaw aw zet mi ṭhian le rual, laihri sempi pawl tla cu ṭhen aw tahrat in thlua le tlang dangdang ah ṭhen aw a rak si. Cui thlihran in kan Thaihlio tla cu a rak fen ve hmang. Cuticun VCTH cu a lang ten rak cawl cu asi. Cui boruak thlihran ih phenah ziang hman ih a fen le a hmit thei lo mi Thaihlio thinlung le thlarau cu kan thinlung sungah a cam ringring.

Vancung Thaihlio ti cu zate theih mi asi. A hleice in thuanthu roling a duhtu pawl in cu an thei sinsin ding. VCTH ti cu a mawi zet mi Vancung fala tinak asi ko. Mawinak lawng siloin fimnak, theihnak thawn a khat mi tla an si fawn. Kan VCTH tla hi thuanthu roling sungih vancung fala bangin kan miphun, khua le ram hrangah a mawi mi le theihkauhnak, ruahnak thazang a pe thei tu si hram seh ti ruahsannak thawn tu nan hnen ah http://www.vcth.net/ tin Chin website thar a thleng. Hih VCTH thla a zap salnak thawngin a ṭhenthek aw mi ṭhian le rual, calai rualpi pawl tla a finkhawm sal ding ti zumnak tumpi ka nei. Cuhlei-ah calai rualpi thar tampi tla sarsuak in hi VCTH cu kan tlanlennak calai tualrawn te sihramseh ti saduh ka that fawn. Ruahnak, cahram, nunthuleng, theihkauhnak, baizai, thu dangdang le siarnak lamin in ṭan pi cio hram uh law.

Kan lungawi.

Editor